قازاقتىڭ قوس باتىرى وليمپيادا ويىندارىنان شەتتەتىلدى

استانا. قازاقپارات - الماس وتەشوۆ پەن جاسۇلان قىدىربايەۆ ريو وليمپياداسىنا بارمايدى. بۇل تۋرالى ب ا ق وكىلدەرىنىڭ ساۋالىنا جاۋاپ بەرگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.

قازاقستان رەسپۋبليكاسىندا 2006-2016-جىلدارعا ارنالعان گەندەرلىك تەڭدىك ستراتەگياسىن ىسكە اسىرۋدىڭ الدى الا قورىتىندىلارىنا ارنالعان حالىقارالىق كونفەرەنتسيا اياسىندا ب ا ق وكىلدەرىنىڭ دوپينگپەن ۇستالعان سپورتشىلارعا شارا قولدانىلا ما، دەگەن ساۋالىنا جاۋاپ بەرگەن مينيستر: «ارينە، قولدانىلادى. ءبىز مۇنداي داۋعا ىلىككەن سپورتشىلاردى جارىستان الىپ جاتىرمىز. ماسەلەن، ءبىر اۋىر اتلەت قىزىمىز ءومىر بويىنا سپورتتان شەتتەتىلدى. ءبىز بۇعان قاتاڭ قاراۋىمىز كەرەك»، - دەدى ول.

بۇعان قوسا ول، الماس وتەشوۆ پەن جاسۇلان قىدىربايەۆقا دا شارا قولدانىلعانىن، ونىڭ ءبىرى 1 جىلعا، ەكىنشىسى 2 جىلعا سپورتتان شەتەتىلگەندىگىن اتاپ ايتتى. دەمەك، بۇل سپورتشىلارىمىز الداعى ريو وليمپياداسىنان شەتتەتىلگەن.

سونىمەن قاتار ا. مۇحامەدي ۇلى وليمپيادا جەڭىمپازى اتانعان سپورتشىلارعا بەرىلەتىن سىياقى كولەمى وزگەرىسسىز قالاتىندىعىن اتاپ ءوتتى.

«بىزدە ۇكىمەتتىڭ بەكىتىلگەن قاراجاتى بار. ءبىرىنشى ورىنعا 250 مىڭ، ەكىنشى ورىنعا 150 مىڭ، ءۇشىنشى ورىنعا 75 مىڭ دوللار بەرىلەدى. بۇل ناقتى ۇكىمەتتەن بولىنەتىن قارجى. مۇنان بولەك، وزدەرىڭىز بىلەتىندەي، ءاربىر فەدەراتسيا، وبلىستار ءوز دەڭگەيىندە سپورتشىلارعا قۇرمەت كورسەتىپ جاتادى. مەنىڭ ويىمشا، ءبىزدىڭ جەڭىمپازدارعا بەرىلەتىن اقشالاي سىيلىق دۇنيەجۇزىندەگى ەڭ كولەمدى سىيلىقتاردىڭ ءبىرى»، - دەدى ول.

اۆتور: مارلان جيەمباي