اۋعانستان ستۋدەنتتەرى قازاقستاننىڭ وقۋ ورىندارىن جوعارى باعالادى

استانا. قازاقپارات - اۋعان ەلى «قازاقستان- اۋعانستان» مەملەكەتتىك ءبىلىم بەرۋ باعلارلاماسىن جالعاستىرۋعا ءوتىنىش ءبىلدىردى.

بۇل تۋرالى ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا قازاقستاننىڭ اۋعانستان يسلام رەسپۋبليكاسىنداعى توتەنشە جانە وكىلەتتى ەلشىسى ءومىرتاي ءبىتىموۆ ءمالىم ەتتى.

بۇل باعدارلاما 2010 -جىلى باستالعان بولاتىن. بۇل باعىتتا 50 ميلليون دوللار ءبولىندى. 10 جىلعا نەگىزدەلگەن وسى باعدارلاما اياسىندا قازاقستان جوعارى وقۋ ورىندارىندا 1 مىڭ اۋعان ستۋدەنتى ءبىلىم الادى.

وسى رەتتە ءو. ءبىتىموۆ پرەزيدەنت نۇرسۇلتان نازاربايەۆتىڭ باستاماسى وتە تانىمال بولعاندىعىن اتاپ ءوتتى. وتكەن جىلى 200 ستۋدەنت شاقىرىلعان كەزدە ءبىر ورىنعا 1 مىڭ ادام ۇمىتكەر بولعان ەكەن. بۇگىندە اۋعانستننىڭ 200 ازاماتى وقۋىن ءتامامدادى، ولاردىڭ اراسىندا پوليتسەيلەر مەن شەكاراشىلار دا بار. سونىمەن قاتار مەديتسينالىق ماماندىقتار بويىنشا ءبىلىم الىپ جاتقان ستۋدەنتتەر وقۋىن جالعاستىرۋدا. ال ينجەنەر ماماندار اۋعانستاندا جۇمىستارىنا كىرىسىپ كەتكەن كورىنەدى.

«ءبىزدىڭ ءبىلىم بەرۋ باعدارلامامىز حالىق پەن ۇكىمەتتىك قۇرىلىمدار اراسىندا وتە جوعارى باعاعا يە بولىپ وتىر. ءبىزدىڭ وقۋ ورىندارىمىز جايىندا ولاردا وتە جاقسى پىكىر قالىپتاستى. ولار وسى باعدارلامانى جالعاستىرۋدى، سونداي- اق ونى كەڭەيتە ءتۇسۋدى ءوتىندى. سەبەبى، بۇل باعىتتاعى جۇمىستار اۋعانستان ەكونوميكاسىن كوتەرۋگە جانە وسى ەلدەگى احۋالدى تەزىرەك تۇراقتاندىرۋعا  قوسىپ وتىرعان ەلەۋلى ۇلەس بولىپ تابىلادى»، - دەدى ەلشى.

وسى رەتتە ول قازاقستاندا ءبىلىم العان اۋعان ستۋدەنتتەرى ەشقاشان لاڭكەستەردىڭ قاتارىنا قوسىلمايتىندىعىنا، كەرىسىنشە، لاڭكەستىك پەن ەكسترەميزمگە جانە ەسكىرتكى ساۋداسىنا قارسى كۇرەسەتىن ازاماتتار بولاتىنىنا سەنىم ارتتى.  

 اۆتور:   رۋسلان عابباسوۆ