قىزىلوردا وبلىسى اكىمدىگى مەن قازاق ۇلتتىق اگرارلىق ۋنيۆەرسيتەتى مەموراندۋمعا قول قويدى

قىزىلوردا. قازاقپارات - ءوڭىردىڭ اۋىلشارۋاشىلىعىن بىرلەسىپ دامىتۋ ماقساتىندا قازاق ۇلتتىق اگرارلىق ۋنيۆەرسيتەتى رەكتورى تىلەكتەس ەسپولوۆ پەن وبلىس اكىمى قىرىمبەك كوشەربايەۆ مەموراندۋمعا قول قويدى.

 بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

وسى كەلىسىم نەگىزىندە اتالعان وقۋ ورنىنىڭ عالىمدارى وبلىسىمىزدىڭ بارلىق اۋداندارىنداعى اۋىلشارۋاشىلىق جەرلەرىنىڭ مۇمكىندىگىن زەردەلەپ، ءونىم ءوندىرۋ كولەمىن ارتتىرۋدى قولعا الماق.  

ءوڭىر باسشىسى قىرىمبەك كوشەربايەۆ بۇگىنگى داعدارىس ۋاقىتىندا ونەركاسىپتى ءارتاراپتاندىرۋ قاجەتتىگىن، ونىڭ ىشىندە اۋىلشارۋاشىلىق سالاسىن قارقىندى دامىتۋدى قولعا الۋ قاجەتتىگىن ايتىپ ءوتتى. وسى ماقسات اياسىندا ايماقتىڭ اۋىلشارۋاشىلىق سالاسىن جاڭاشا جانداندىرۋ ءۇشىن قازاق ۇلتتىق اگرارلىق ۋنيۆەرسيتەتى دەم بەرمەك. وبلىستاعى شارۋالاردىڭ بىلىكتىلىگىن ارتتىرىپ، ءونىم ءوندىرۋ كولەمىن وسىرۋگە ەندى وسى وقۋ ورنىنىڭ عالىمدارى كۇش سالاتىن بولادى.   

 - ءبىز ەگىن شارۋاشىلىعىن ءارتاراپتاندىرۋدى قولعا الىپ وتىرمىز. ول - بۇگىنگى كۇننىڭ تالابى. وسى ويىمىزدى جۇزەگە اسىرۋ ءۇشىن بىزگە عالىمداردىڭ كومەگى قاجەت. ەكىجاقتى مەموراندۋم اياسىندا جۇزەگە اسىرىلاتىن جۇمىستار جەمىسىن بەرەدى دەپ سەنەمىز. ايتا كەتۋ كەرەك، اۋىلشارۋاشىلىعىن دامىتىپ، وڭدەۋ ونەركاسىبىن دامىتۋ ءۇشىن مىقتى ماماندار قاجەت. وسى ورايدا ەلىمىزدەگى جوعارى وقۋ ورىندارىندا ءبىلىم الۋ ءۇشىن وبلىس اكىمىنىڭ گرانتىن تاعايىنداپ كەلەمىز. قازاق ۇلتتىق اگرارلىق ۋنيۆەرسيتەتىندە ءبىلىم الىپ جاتقان 238 سىربويىلىق ستۋدەنتتىڭ 60-ى وبلىس اكىمىنىڭ ءبىلىم گرانتتارى نەگىزىندە وقىپ جاتىر، - دەدى وبلىس اكىمى قىرىمبەك كوشەربايەۆ.   

 مەموراندۋم نەگىزىندە قازاق ۇلتتىق اگرارلىق ۋنيۆەرسيتەتىنەن كەلگەن عالىمدار جوعارى ساپالى جانە جوعارعى سورتتى اۋىل شارۋاشىلىعى داقىلدارىن ەندىرۋ، اۋىلشارۋاشىلىعى مالدارىن جەدەل وسىرەتىن بيوتەحنولوگيالىق ادىستەردى دامىتاتىن بولادى. وعان قوسا مەملەكەتتىك- جەكە ارىپتەستىك اياسىندا اگروونەركاسىپ سۋبەكتىلەرىنە ءبىلىم بەرۋ جۇيەسىن دامىتۋ، كادرلار قورىنىڭ الەۋەتىن كوتەرۋ بۇگىنگى كەلىسىم اياسىندا جۇزەگە اسادى.   

 - مەملەكەت باسشىسىنىڭ وتاندىق اۋىل شارۋاشىلىعى سالاسىنىڭ الدىنا قويعان مىندەتتەرىن جۇزەگە اسىرۋ ءۇشىن عىلىم، ءبىلىم جانە ءوندىرىس تىعىز قارىم- قاتىناستا جۇمىس جاساۋى قاجەت. بۇگىنگى ءبىزدىڭ ءىس- ساپارىمىزدىڭ نەگىزى ماقساتى- قازاقستاننىڭ اگرارلىق سالاسىنداعى عىلىم، ءبىلىم ۇجىمدارىندا قىزمەت اتقارىپ جۇرگەن عالىمدار مەن وبلىستىڭ اۋىلشارۋاشىلىق قۇرىلىمدارىندا قىزمەت اتقارىپ جۇرگەن كاسىپكەرلەر اراسىندا تىعىز بايلانىس ورناتۋ. وسى سالادا شەشىمىن تاپپاعان ماسەلەلەردى جان- جاقتى زەرتتەپ جانە ونى دامىتۋدىڭ نەگىزگى باعىتتارى بويىنشا عىلىمي تاجىريبەلىك كومەك كورسەتۋ، - دەدى قازاق ۇلتتىق اگرارلىق ۋنيۆەرسيتەتىنىڭ رەكتورى تىلەكتەس ەسپولوۆ.   

 ۋنيۆەرسيتەت عالىمدارى وڭىرلەردەگى اۋىلشارۋاشىلىق جەرلەرىن قۇنارلاندىرۋدى دا قولعا الماقشى. عالىمداردان وقىپ ۇيرەنگەندەرىن شارۋالار مەن اۋىلشارۋاشىلىعىنىڭ ماماندارى ءوز ماقساتتارىنا قولدانىپ، ءوز جەرلەرىن كۇتىپ- باپتاۋدىڭ قىر- سىرىنا دا قانىعادى.

اۆتور:   ەلۋباي اۋەزوۆ