جامبىل وبلىسىندا پوليتسەي بەس بالانى اسىراپ الدى - فوتو

استانا. قازاقپارات - جامبىل وبلىسى مەركە اۋدانىنىڭ جەرگىلىكتى پوليتسيا قىزمەتىنىڭ اعا سەرجانتى عالىم ارىستانبايەۆ جارىمەن بىرگە ءۇش تۋعان جانە بەس اسىراپ العان بالاسىن تاربيەلەپ وتىر.

جامبىل وبلىستىق ءى ءى د باسپا ءسوز قىزمەتىنەن حابارلاعانداي، عالىم ارىستانبايەۆ كوپ جىلدار بويى وتان يگىلىگى ءۇشىن ادال قىزمەت ەتىپ كەلەدى.

38 جاستاعى پوليتسەي ءۇش ۇلدىڭ اكەسى. ول ايەلىمەن بىرگە ءبىر جارىم جىل بۇرىن بەس بالانى تاربيەلەۋگە العان.

بۇل تۋرالى عالىمنىڭ ارىپتەستەرى كەزدەيسوق ءبىلىپ قالدى.

«وتباسىم ۇلكەن. مۇنى ءارقاشان ارمانداعانمىن. ايەلىم ءاليا مەنى قولدايدى. وتاسقانىمىزعا 10 جىل بولدى. قاسىمىزدا بالالارىمىز، انام، تۋىستارىم بار. ولاردىڭ دەندەرى ساۋ. ەڭ باستىسى سول. مەن ءوزىمدى ەڭ باقىتتى جانمىن دەپ ەسەپتەيمىن»، - دەدى وتاعاسى.

ۇلدارى بولعاندىقتان ول قىز بالا اسىراپ العىسى كەلگەنىن ايتادى.

«جانۇيالىق تيپتەگى بالالار ءۇيى» باعدارلاماسى تۋرالى ۆ. ساۆۆا بالالار ءۇيىنىڭ مۇعالىمى فاريدا ايتتى. ايەلىممەن كەڭەسىپ، وسىنداي جاۋاپتى شەشىم قابىلدادىق. بەس بالانى اسىراپ الۋ يدەياسى بالالارمەن تانىسىپ جاتقاندا ايەلىمنىڭ ويىنا كەلدى. ءبىر بالانى الۋعا بارىپ، جاسى ءار ءتۇرلى ءتورت بالانى اكەلدىك. ولار ءبىر جانۇيادان بولعاندىقتان، بولگىمىز كەلمەدى. ءبىر بالانى «ءۇمىت» بوبەكجايىنان اسىراپ الدىق. قازىر بۇل ىسىمە ەش وكىنبەيمىن»، - دەدى عالىم ارىستانبايەۆ.

ايتا كەتۋ كەرەك، عالىمنىڭ ۇلكەن جانۇياسى ءتۇرلى ۇلت وكىلدەرىنىڭ بولۋىمەن ەرەكشەلەنەدى.