اقتوبەدە ۆەنگريانىڭ كونسۋلدىعى اشىلدى - فوتو
جۇزدەسۋ بارىسىندا تاراپتار ەكىجاقتى ءوزارا ءتيىمدى ىنتىماقتاستىق پەن بىرلەسكەن جوبالاردى جۇزەگە اسىرۋ جولدارىن تالقىلادى.
«ازىرگە ءبىزدىڭ ساۋدا-ەكونوميكالىق بايلانىستارىمىز تومەن دەڭگەيدە. اقتوبە وبلىسى مەن ۆەنگريا ەلىنىڭ اراسىنداعى تاۋار اينالىمى نەبارى 10 ميلليون دوللارعا جۋىق. الايدا، ءبىزدىڭ الداعى ۋاقىتقا كوزدەپ وتىرعان جوسپارلارىمىز جۇزەگە اسار بولسا، بۇل كورسەتكىشتەر ەسەلەپ ارتپاق. وعان اقتوبەدە اشىلعان ۆەنگريانىڭ كونسۋلدىعىنىڭ ىقپالى زور بولادى دەگەن ويدامىن»، - دەدى بەردىبەك ساپاربايەۆ.
سونداي-اق وبلىس باسشىسى قازاقتار مەن ماديارلاردىڭ اراسىندا تاريحي جانە مادەني بايلانىستاردىڭ ەجەلدەن بار ەكەندىگىن اتاپ ءوتتى. «ەكى حالىق تا كەڭ دالادا تىرشىلىك ەتكەن. سونىڭ اسەرىنەن بولار ۆەنگر تىلىندە تۇركى سوزدەرى وتە كوپ كەزدەسەدى. وسىنىڭ ءوزى ءبىزدىڭ حالىقتاردىڭ ەجەلدەن تاتۋ قارىم-قاتىناستا بولعاندىعىن كورسەتسە كەرەك».
وبلىس اكىمىنىڭ پىكىرىنشە، ۆەنگريالىق دەلەگاتسيا وكىلدەرىنىڭ كەلۋى مەن شىعىس ەۋروپاداعى مەملەكەتتىڭ اقتوبەدەن كونسۋلدىعىن اشۋى ءبىر كەزدەردەگى جاقسى-قارىم قاتىناستاردى ودان ءارى جانداندىرا تۇسەرى ءسوزسىز. بۇل باعىتتا جەرگىلىكتى بيلىكتىڭ الدىندا تۇرعان باستى مىندەتتەردىڭ ءبىرى شەتەلدىك ينۆەستيتسيانى تارتۋ بولماق.
كەزدەسۋ بارىسىندا جىلىجاي قۇرىلىسى، جەمىس-جيدەك ونىمدەرىن قالبىرلاۋ، اۋىز سۋدى تازارتۋ، ءسۇت ونىمدەرىن جانە ءبيدايدى قايتا وڭدەۋدە ىنتىماقتاستىقتى جولعا قويۋ جايى ايتىلدى.
ۆەنگريا ەلشىسى اندراش باراني ءوز ەلىنىڭ اقتوبە وبلىسىنا دەگەن ۇلكەن قىزىعۋشىلىعىن اتاپ ءوتتى. ونىڭ ايتۋىنشا، العاشقى قادامداردىڭ ءبىرى قازاقستاننىڭ اۋىل شارۋاشىلىعى سالاسىنا تىكەلەي ينۆەستيتسيا تارتۋمەن شۇعىلداناتىن بىرلەسكەن قور قۇرۋ بولماق. قورعا 20 ميلليون دوللاردى «قازاگرو» ۇلتتىق كومپانياسى قۇيدى جانە تاپ وسىنداي قارجىنى ۆەنگريانىڭ «ەكسيمبانكى» سالدى.
ۆەنگريا - اقتوبە وبلىسىندا كونسۋلدىعىن اشقان ەكىنشى ەۋروپالىق ەل. اعىمداعى جىلى قاڭتاردا ايماققا وسىنداي ميسسيامەن چەحتار كەلگەن بولاتىن. سونداي-اق اقتوبەدە وڭتۇستىك كورەيا جانە تۇركيا ءوز وكىلدىكتەرىن اشۋدى جوسپارلاپ وتىر.
