تىڭدارماندارى «حيدجابتى قورلاعانى» ءۇشىن تانىمال ليۆاندىق ءانشىنى سىنعا الدى

استانا. قازاقپارات - تاياۋ شىعىس ەلىنە تانىمال ءانشى ءارى اكتريسا حايفا ۆاحبيدىڭ حيدجاب كيگەن سۋرەتىن كورگەن تىڭدارماندارى ونى سىنعا الدى.

40 جاستاعى ءانشى Facebook پاراقشاسىندا ارقاسى اشىق قارا ماتادان حيدجاب سەكىلدى كيىم كيگەن سۋرەتىن جاريالاعان. كوپشىلىك مۇنى ءدىني ەلەمەنتتەردى قورلاۋ دەپ قابىلدادى.

ۆاحبيدىڭ پاراقشاسىندا 8 ميلليونداي ادام تىركەلگەن. تالقىعا تۇسكەن سۋرەت 61 مىڭ لايك جيناپ ۇلگەرگەن. ياعني، انشىگە تاعىلعان سىنمەن كەلىسپەيتىن قولدانۋشىلار دا تابىلىپ، وعان قولداۋ بىلدىرگەن.

حايفا ۆاحبي تاياۋ شىعىستا تانىمالدىعى جاعىنان نەنسي ادجرامنان كەيىنگى ەكىنشى ورىندا تۇر. ول وڭتۇستىك ليۆاندا حريستياندار وتاسىندا ومىرگە كەلگەن. ول جاستايىنان مودەل اتانىپ، «وڭتۇسىتك ليۆان ارۋى» تيتۋلىن 16 جاسىندا جەڭىپ الدى. 2002 -جىلى «ۋاقىتى كەلدى» دەگەن اتاۋمەن العاشقى البومى، 2005 -جىلى «ءومىر سۇرگىم كەلەدى» اتتى ەكىنشى البومى جارىققا شىققان.

Stan.kz