الماتى پوليتسياسى ءيت ۇستاۋدىڭ ەرەجەسىن بۇزعاندارعا ايىپپۇل سالدى - فوتو

الماتى. قازاقپارات - الماتى پوليتسياسى ءيت ۇستاۋدىڭ ەرەجەسىن بۇزعاندارعا ايىپپۇل سالدى. بۇل تۋرالى قالالىق ءى ءى د باسپا ءسوز قىزمەتى حابارلادى.

 ارنايى رەيد الاتاۋ جانە جەتىسۋ اۋداندارىندا جۇرگىزىلدى.

«ەگەر جانۋاردىڭ موينىندا قارعىباۋ جوق بولسا، ول قاڭعىباس ءيت. ونى ۆەتەرينارلىق قىزمەت اۋلايدى. ق ر ا ق ك 408-بابىندا كورسەتىلگەندەي، ءيتتى سەرۋەنگە الىپ شىققاندا، بىرنەشە ەرەجە ساقتالۋى كەرەك. وسى ەرەجەلەردى بۇزعاندارعا قاتىسى رەيد بارىسىندا 26 حاتتاما تولتىرىلدى. 18 -ساۋىردەن بەرى 153 دەرەك انىقتالدى. قوجايىندارىنا 263 مىڭ تەڭگە كولەمىندە ايىپپۇل سالىندى»، - دەدى الاتاۋ اۋداندىق ىشكى ىستەر باسقارماسى جول پاترۋلدىك پوليتسياسىنىڭ وكىلى اۋەسحان ەلتوقوۆ.

ال، جەتىسۋ اۋدانىندا رەيد بارىسىندا 7 ادام اكىمشىلىك جاۋاپكەرشىلىككە تارتىلدى.

«اۋداندا جىل باسىنان بەرى 157 ادامعا 157559 تەڭگە كولەمىندە ايىپپۇل سالىندى. بۇگىن ۆەتەرينارلىق قىزمەتپەن بىرىگە وتىرىپ، «دوروجنيك»، «قۇلاگەر» شاعىن اۋداندارىن ارالادىق. اتالعان اۋدانداردا 10-نان اسا جانۋاردى ۇستايتىن وتباسىلار تابىلدى»، - دەدى جەتىسۋ ءى ءى ب ج پ ق باسشىسىنىڭ ورىنباسارى انارباي تاستانوۆ.

 اۆتور: گۇلميرا عوسمانالي