وڭتۇستىك قازاقستاننىڭ مۋزەي قىزمەتكەرلەرى كەنەسارى حاننىڭ قىلىشى مەن ءۇسىپباي ءبيدىڭ تورسىعىن قاراعاندىعا اكەلدى - فوتو

قاراعاندى. قازاقپارات - و ق و- دان كەلگەن قاراعاندىداعى كورمەگە ەرەكشە ەكسپوناتتار قويىلدى، دەپ حابارلادى مادەني دەلەگاتسيانىڭ وكىلدەرى.

«قاراعاندىعا ساپار جاساۋعا مۇقيات دايىندالدىق. ءبىزدىڭ مۋزەيىمىزدە 170 مىڭنان استام جادىگەر ساقتالعان. سىزدەرگە سونىڭ 1000 عا جۋىعىن اكەلدىك. كورمە وڭتۇستىك ولكەنىڭ تاريحىنان سىر شەرتەدى»، - دەدى   و ق و مادەنيەت باسقارماسىنىڭ باسشىسى كۇليا ايداربەكوۆا.

ول ۇلى جەڭىستىڭ 71 جىلدىعىن تويلاۋ قارساڭىندا ۇلى وتان سوعىسىنا قاتىسقان جەرلەستەرگە ارناپ جەكە ستەند دايىندالعانىن ايتتى.

دەلەگاتسيا باسشىسى ەرەكشە جادىگەر - قازاقتىڭ سوڭعى حانى كەنەسارى قاسىم ۇلىنىڭ قىلىشىنا نازار اۋداردى.

«حازاق حالقىنىڭ، اسىرەسە باسقارۋشىلاردىڭ داستۇرىندە قارۋدى ۇرپاقتاعى ۇلدارعا تاپسىرۋ ادەتى بولعان. كەنەسارى جانۇياسىندا دا وسىنداي ءداستۇر بولعان. 1841 -جىلى اق كيىزگە كوتەرىلگەن قازاقتىڭ سوڭعى حانى 1847 -جىلى قاقتىعىستاردا قازاعا ۇشىراعانى بەلگىلى. ول دۇنيەدەن وزعان سوڭ ەكى ايەلىنەن 8 ۇل قالدى. كەنجەسى احمەت سول كەزدە 5 جاستا بولعان. احمەتتىڭ ۇلى ءازىمحان، كەنەسارىنىڭ نەمەرەسى 1931 -جىلى اتاسىنىڭ قىلىشىن مۇراجايعا تاپسىرعان»، - دەدى وڭتۇستىك قازاقستان وبلىسىنىڭ تاريحي- ولكەتانۋ مۋزەيىنىڭ اعا عىلىمي قىزمەتكەرى لاريسا موروزوۆا.

«مۋزەيگە سىيلانعان جادىگەر ءبىزدىڭ زامانىمىزعا دەيىن ساقتالدى»، - دەدى مۇراجاي قىزمەتكەرى.

جادىگەردى بىرنەشە رەت استاناعا، وزگە وڭىرلەرگە اپارعان. كەنەسارى قىلىشى گەرمانياعا دا اپارىلعان.