ە. قارين: الەمدىك ساياساتتاعى جاعىمسىز تەندەنتسيانىڭ ءبىرى - ەلدەر اراسىنداعى اشىق تەكە-تىرەس
فورۋم اراسىنداعى ءۇزىلىس كەزىندە ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى، بەلگىلى ساياساتتانۋشى ەرلان قاريننىڭ وسى مالىمدەمەگە قاتىستى ويىن بىلدىك.
ەرلان قاريننىڭ پىكىرىنشە، بۇل قۇبىلىس قازىر «سەنىمسىزدىك» دەگەن ءسوزدىڭ اياسىنا سىيمايدى، بۇل قۇبىلىس قازىر ناعىز اشىق تەكە-تىرەسكە اينالعان.
«سەنىمسىزدىك بار. ونى جوققا شىعارا المايمىز. ونى ءبىز انىق كورىپ وتىرمىز. ءتىپتى، بۇل قۇبىلىستى 10-15 جىل بۇرىن «سەنىمسىزدىك» دەپ ايتا الار ەدىك، قازىر بۇل سەنىمسىزدىك ەمەس، الىپ مەملەكەتتەر اراسىنداعى اشىق تەكە-تىرەسكە، قاقتىعىسقا اينالىپ وتىر. 10-15 جىل بۇرىن الەمدىك ساراپشىلار «بولاشاقتا الىپ مەملەكەتتەر اراسىندا تىكەلەي اسكەري قاقتىعىستار بولمايدى، مەملەكەتتەر جاناما تۇردە شيەلەنىسكە بارۋى مۇمكىن» دەپ ايتار ەدى.
ءبىراق، سوڭعى ۋاقىتتاعى الەمدىك ساياساتتاعى جاعىمسىز تەندەنتسيانىڭ ءبىرى - مەملەكەتتەر اراسىنداعى تىكەلەي ساياسي-ەكونوميكالىق جانە اسكەري قاقتىعىستاردىڭ ورىن الۋى كۇشەيىپ بارا جاتىر. سوندىقتان، قازىر وكىنىشتىسى، سەنىمسىزدىكتىڭ ەمەس، كادىمگى اشىق تۇردەگى قاقتىعىستىڭ پايدا بولعانىن، ونىڭ ءورشىپ بارا جاتقانىن كورىپ وتىرمىز»، - دەدى ە. قارين.
بۇل رەتتە، ە. قارين ءۇش كۇنگە سوزىلاتىن ХІІІ ەۋرازيا مەديا فورۋمى - تەك تالقىلاۋ الاڭدارىنىڭ ءبىرى ەكەنىن جانە قانداي دا ءبىر شەشىم قابىلدايتىنداي بىرىككەن ۇلتتار ۇيىمىنىڭ سەسسياسى ەمەس ەكەنىن اتاپ ءوتتى.
اۆتور: كەنجەكەي توقتامۇرات قىزى
