اتىشۋلى «كەشيۋ» توبىندا ونەر كورسەتكەن ايدانا كۇيەۋىنىڭ ءبىرىنشى نەكەسى تۋرالى ايتىپ بەردى
بۇل توپقا جۇزدەن جۇيرىكتەردى عانا تاڭدايتىنىن حالىق بىلەدى. بويجەتكەننىڭ سىرت كەلبەتى قانشالىقتى ءمىنسىز بولسا، داۋسى دا ءدال سونداي. سۇيكىمدىلىگىمەن باۋراي بىلەتىن ءانشى بۇگىندە وزىندىك تىڭدارماندارىن جيناپ ۇلگەردى. ول وتاندىق باعدارلامالاردىڭ بىرىندە جولداسىنىڭ وسىعان دەيىن ءبىر رەت وتاسقانىن، ونىڭ ۇلدارىن ءوز بالالارىنداي كورەتىنىن ايتتى.
ءانشىنىڭ سۇيىكتىسى شوۋ-بيزنەس سالاسىندا كوپ ۋاقىتتان بەرى پروديۋسەر بولىپ ءجۇر. قازىرگى تاڭدا «ينديگو» توبىنىڭ جەتەكشىسى. مەدەنوۆا جۋرناليست دانا رىسكەلدينوۆانىڭ «سۇيىكتىڭىزدىڭ سىزگە دەيىن وتباسى بولعانىنا قىسىلمايسىز با؟» دەگەن سۇراعىنا «مەنىڭشە، بىرەۋدى سىناۋعا قۇقىعىمىز جوق. العاشقى نەكەسى ءساتسىز بولسا، ەكىنشى وتباسىندا بارلىعى جاقسى بولادى. مەن ونىمەن بايلانىستى دۇنيەنىڭ بارلىعىن جاقسى كورەمىن»، - دەپ جاۋاپ بەردى.
مۇنىمەن قاتار، ءوزىنىڭ تۋىسقاندارىنان العاشقى نەكەسىنەن بالالارى بار ەر ادامعا تۇرمىسقا شىعۋعا قارسىلىعى بولماعانىن جەتكىزدى.
«وتباسىم مەنىڭ تاڭداۋىما ارالاسپايدى. ماعان سەنگەندىكتەن وسىلاي جاساسا كەرەك. قازىر زامان باسقا. بىرەۋ بىرەۋگە اقىل ايتاتىن ۋاقىت ەمەس. الىشەردىڭ ۇلدارى سونداي جاقسى. ناعىز ديپلوماتتار دەسە دە بولادى. كەرىسىنشە، قىزىمنىڭ ءدال وسىنداي ەكى اعاسى بار ەكەنىن ماقتان تۇتامىن. ءبىرىنشى نەكەسىنە قاتىستى ارامىزدا ەشقانداي قيىندىقتار بولعان ەمەس. ول مەنى جامان ويعا قالدىرىپ، قىزعاندىراتىنداي ارەكەتتەرگە بارمايدى»، - دەپ مەدەنوۆا سۇيىكتىسىنىڭ ۇلدارىن ءوز بالاسىنداي كورەتىنىن ايتىپ ءوتتى.
ءبىر قىزىعى، قىزداردان قۇرالعان ءتۇرلى توپقا جەتەكشىلىك ەتىپ جۇرگەن الىشەر جارىنا پروديۋسەر بولعىسى كەلمەيدى ەكەن. مۇنى ايدانا دا قالامايتىن كورىنەدى.
«نە ءۇشىن؟ مەنىڭشە، ماعان مورالدىق، ماتەريالدىق تۇرعىدان قولداۋ كورسەتىپ جاتقانىنىڭ ءوزى جەتكىلىكتى»، - دەپ ءانشى قىسقا قايىردى. مۇنىمەن قاتار، قالاي تانىسقاندارىن ايتىپ بەردى.
«وتباسىن قۇرماي تۇرىپ ءبىر-ءبىرىمىزدى جاقسى تانىدىق. گاسترولدىك ساپارلاردا كورىپ جۇردىك. مەن اسا ءمان بەرمەيتىنمىن. ارامىزدا ءبىر كورگەننەن عاشىق بولاتىنداي سەزىم دە بولمادى. بار بولعانى كەزدەيسوق ءدامحانالاردىڭ بىرىندە جولىعىپ، سول كۇنى كەشكە قايتا كورىستىك. وسى ساتتەن باستاپ تاعدىردىڭ ماڭدايىمىزعا بىرگە بولۋدى جازعانىن سەزىنگەندەي بولدىق»، - دەيدى ءانشى.
ءدال قازىر قوس عاشىقتىڭ ءامينا ەسىمدى قىزدارى بار. كەزەكتى دەمالىستان ورالعان ءانشى «مەنىمەن بيلە» اتتى انگە بەينەبايان ءتۇسىرىپ، سۇلۋلىق ستۋدياسىن اشتى.
stan.kz
