قازاقستاندىق عالىم رەسەيدەن كوتەرىلىستە شاھيد بولعان بابالارىنىڭ قۇنىن تالاپ ەتتى

استانا. قازاقپارات - تانىمال وتاندىق عالىم، تاريح عىلىمدارىنىڭ دوكتورى ءازىمباي عالي رەسەيدەن قازاق گەنوتسيدىن مويىنداۋدى تالاپ ەتتى.

بۇل تۋرالى Abai.kz پورتالى حابارلايدى.

«بيىل 1916-جىلعى كوتەرىلىستىڭ 100 جىلدىق ازالىق «يۋبيلەيى» بولماق... مەن قازاق پەرزەنتى رەتىندە كوتەرىلىستە شاھيد بولعان بابالارىمنىڭ قۇنىن تالاپ ەتەمىن. الدىمەن، 1916-جىلعى كوتەرىلىسكە 100 جىلدىق تولعان تۇستا بۇل وقيعانى قازاق گەنوتسيدىنىڭ باسى دەپ مويىندايمىن. گەنوتسيدتىڭ بەل ورتاسى - 1930-1932-جىلدار، قولدان ۇيىمداستىرىلعان اشارشىلىقپەن كوممۋنيستەر 2 ميلليون قازاقتى قىردى. ەكىنشى دۇنيەجۇزىلىك سوعىس بىتىسىمەن يادرولىق قارۋ پارمەنى مەن اسەرىن قازاققا سىنادى. بۇل گەنوتسيدتىڭ جالعاسى ەمەي نەمەنە؟ قازاقتى قالاعا كىرگىزبەدى. ءوز باسىم قالالىق پروپيسكانى ەگەمەندىك العاننان كەيىن عانا الدىم»، - دەيدى ول ءوز ماقالاسىندا.

عالىم رەسەيدىڭ گەنوتسيد فاكتىسىن مويىنداۋىن تالاپ ەتۋدە.

«گەنوتسيدتىڭ بولعانىن رەسەيگە مويىنداتۋ، ارمياندار، ەۆرەيلەر سياقتى ارنايى زاڭ قابىلداۋ، گەنوتسيد - ازالىق ەستەلىك مەموريالىن سالدىرۋ كەرەك. ال بۇگىن بيلىك پەن حالىقتى قازاق قاسىرەتىنە قازاقتىڭ دا، قازاق ەمەستىڭ دە، باسقا مەملەكەتتەردىڭ دە نازارىن اۋدارتۋدى، سول ءبىر ازالى كۇندەردى «قازاق كەشكەن گەنوتسيد» دەپ كۇن تارتىبىنە ەڭگىزۋدى تالاپ ەتەمىن»، - دەپ ءوز شارتتارىن تىزبەكتەدى اۆتور.