بولاشاققا پايداسى مول حوببيلەر

استانا. قازاقپارات - كۇندەلىكتى كۇيبەڭ تىرشىلىك، ءبىر قالىپتى ءومىر، ادامدى جالىقتىرىپ جىبەرەدى.

جۇمىس، ءۇي، سەرۋەندەۋ، ۇيىقتاۋ - بارلىعى كۇندەلىكتى قايتالانىپ وتىرادى. زەرىگىپ كەتكەن جاندار باسقا ىستەرگە قىزىعىپ، وزىنە تاڭسىق ىستەرمەن اينالىسقىسى كەلەدى. شۇعىلداناتىن جۇمىستار كوپ بولعانىمەن، ولاردىڭ بولاشاقتا سىزگە الىپ كەلەر پايداسى شامالى. سوندىقتان، الداعى ۋاقىتتا ويلاۋ قابىلەتىڭىزگە، ءومىر سۇرۋىڭىزگە ءتيىمدى حوببيلەردى ۇسىنامىز.

ەڭ ءبىرىنشى حوببي تاڭداماس بۇرىن، ونىڭ قانشالىقتى پايدالى ەكەنىنە نازار اۋدارعانىڭىز دۇرىس. ودان كەيىن ءسىزدىڭ ءومىرىڭىز ءۇشىن ونىڭ قانشالىقتى ماڭىزى بار ەكەنىن ەسەپتەڭىز. بوسقا وتكەن ۋاقىت تالاي نارسەدەن تىس قالۋمەن تەڭ.

قۇراستىرۋ، ءسوزجۇمباق شەشۋ

ويلاۋ قابىلەتتى ارتتىرىپ، ەستە ساقتاۋ قابىلەتتى جاقسارتۋ ءۇشىن قۇراستىرماق پەن ءسوزجۇمباق شەشۋدىڭ پايداسى وراسان زور. جاڭا دۇنيەلەرمەن تانىس بولىپ، ەسەپتەۋ كەزىندە جۇيرىكتىگىڭىز ارتا تۇسەدى.

مۇنىمەن قوسا، ءاربىر ءىستىڭ شەشىمىن تابۋ كەزىندەگى توزىمدىلىك پەن شىدامدىلىعىڭىزدى شىڭداي تۇسەدى. ءسوزجۇمباق شەشۋ ءۇشىن ارنايى وتىرىپ دايىندالاتىن جەر كەرەك ەمەس، تەك وزىڭىزبەن الىپ جۇرسەڭىز بولعانى. بوس ۋاقىتىڭىزدى ءتيىمدى ءارى پايدالى وتكىزۋ ءۇشىن تاپتىرماس نارسە.

شەت تىلدەرىن مەڭگەرۋ

ادام ءوزىنىڭ انا تىلىنەن بولەك وزگە ەلدىڭ ءتىلىن مەڭگەرگەن سايىن، دۇنيە تانىمى ءوسىپ، الەمگە باسقاشا كوزقاراسپەن قاراي باستايدى. ەستە ساقتاۋ قابىلەتى ارتىپ، جاڭا نارسەلەرگە قۇشتارلىعى اشىلادى. الەمنىڭ قاي-قاي مەملەكەتىنە دە وڭاي بەيىمدەلىپ كەتۋىنە سەبەپشى بولادى. سەبەبى ويلاۋ قابىلەت جاقسى جەتىلگەن، وزگە تىلدەردى بىلەتىن، ەستە ساقتاۋى جاقسى جاندار ءوز ورتاسىندا دا، وزگە مەملەكەتتە دە سىيلى بولادى.

ۆيدەو ويىندار

ۆيدەو ويىنداردى تۇككە تۇرعىسىز دەپ ايتۋعا بولمايدى. ءاربىر ويىن، ءاربىر كەيىپكەر ادامنىڭ وي ءورىسىنىڭ دامۋىنا، قانداي باعىت تاڭدايتىنىنا سەبەپشى فاكتورلاردىڭ ءبىرى. ويىن ويناۋ ارقىلى ادامنىڭ جىلدام ويلاۋعا، قايتكەن كۇندە دە جەڭىپ شىعۋعا دەگەن ۇمتىلىسىنىڭ دامۋىنا جاقسى اسەر ەتەدى.

ارينە كومپيۋتەرگە وتىرا سالىپ كوزىڭىزگە تۇسكەن ويىنعا تىشقاننىڭ تەتىگىن باسۋدىڭ قاجەتى جوق. ەڭ الدىمەن، ويىن تاڭدار كەزدە ويلاندىراتىن، ماقساتقا جەتۋگە قۇشتارلىقتى اشاتىن، جالىقتىرمايتىن ءتۇرىن تاڭداعانىڭىز دۇرىس. ويلاۋ قابىلەتىن ارتتىرادى دەپ كۇندە ويناۋدىڭ دا قاجەتى جوق. كۇنىنە 30 مينۋت نەمەسە ءبىر ساعات كوڭىل اۋدارساڭىز جەتەدى.

سپورت

سپورتسىز بۇل دۇنيەنى ەلەستەتۋگە بولمايتىن شىعار. سەبەبى ءسىزدىڭ ءاربىر قيمىلىڭىز دەنساۋلىعىڭىزدىڭ جاقسى بولۋىنا كومەكتەسەدى. ماماندىق تالعامايتىن بۇل حوببيمەن ءاربىر ادام اينالىسقانى دۇرىس. الەمنىڭ ءار تۇكپىرىنەن اتاقتى ادامداردى ىزدەسەڭىز، سپورتقا اۋەستىگى بار ەكەنىن اڭعاراسىز.

مىسالى سوكرات - بالۋان، پۋشكين - تاماشا گيمناست ءارى مەرگەن بولعان. سپورت كۇيزەلىستەن ارىلۋعا كومەكتەسەدى جانە بۇلشىق ەتتەرىڭىزدى قاتايتىپ، سىرت كوزگە سىمباتتى ەتىپ كورسەتەدى.

massaget.kz