قىتايدا تۇراتىن قانداسىمىز جاساعان «ابايدىڭ بالالىق شاعى» مۋلتفيلمى كوپتەگەن ەلدەردە كورسەتىلەتىن بولادى
2017-جىلى استانادا ەكسپو حالىقارالىق كورمەسى اشىلۋ كەزىندە «ابايدىڭ بالالىق شاعى» مۋلتفيلمىنىڭ تۇساۋ كەسەرىن وتكىزۋ جانە تاعى باسقا جوسپارلارى تۋرالى اڭگىمەلەپ بەردى.
- ءوزىڭىز جانە كومپانياڭىز جايلى، سونداي-اق «ابايدىڭ بالالىق شاعى» مۋلتفيلمى تۋرالى ايتىپ بەرسەڭىز؟
- ءبىزدىڭ «اباي جولى» كومپانيامىز 2011- جىلدىڭ سوڭىندا تىركەلگەن. مەن 1979- جىلى دۇنيەگە كەلدىم، كىشكەنتايىمنان سۋرەت سالۋعا قىزىقتىم، سۋرەت سالىپ ءوستىم. ءبىراق كاسىبىم - ەكونوميست. قازىر مادەنيەت سالاسىندا انيماتسيا ارقىلى كەلەر ۇرپاقتارعا تاربيە بەرۋ، قازاق ۇلتىنىڭ دانالىعى مەن دارالىعىن رۋحاني كوسەمىمىز - اباي اتامىزدىڭ بالا كەزىن كورسەتۋ ارقىلى جەتكىزۋ، بالالاردى قيىنشىلىقتاردى كەزدەستىرگەن كەزدە سابىرلى جانە اقىلدى بولۋعا ۇيرەتۋ يدەياسىن جۇزەگە اسىرىپ جاتىرمىز.
«ابايدىڭ بالالىق شاعى» مۋلتفيلمىن ەكى جىل دايىندادىق. قازىر ءبىز مۋلتفيلمنىڭ تەك 2 سەرياسىن تۇسىردىك، سەبەبى اباي تاريحي تۇلعا بولعاندىقتان سەناري، كەيىپكەرلەر وبرازدارىن تاڭداۋ ءۇشىن دايارلىق جۇمىسقا كوپ ۋاقىت كەتتى.
2016- جىلدىڭ اياعىنا دەيىن 15 سەريانى دايىندايمىز. ويتكەنى قىتايدىڭ ورتالىق تەلەديدارىندا جانە تاعى دا باسقا بەدەلدى تەلەارنالارىندا كورسەتۋ ءۇشىن مىندەتتى تۇردە كەم دەگەندە 26 سەريا بەرۋ كەرەك. جالپى «ابايدىڭ بالالىق شاعى» مۋلتفيلمىنىڭ 104 سەرياسىن شىعارۋدى جوسپارلاپ وتىرمىز. ءبىزدىڭ ماقساتىمىز - قازاقتىڭ انيماتسياسىن بيىك دەڭگەيگە جەتكىزۋ. مۋلتفيلمدەرىمىزدى امەريكاعا، ەۆروپا مەملەكەتتەرىنە جانە تاعى باسقا ەلدەرگە تاراتۋىمىز كەرەك، دۇنيەنىڭ وزىق مادەنيەتىن عانا قابىلداماي، ءوز مادەنيەتىمىزدى دۇنيەگە تاراتۋشى بولۋىمىز كەرەك.
- اباي تۋرالى مۋلتفيلم قاشان كورسەتىلە باستايدى؟
- «ابايدىڭ بالالىق شاعى» مۋلتفيلمگە 200 دەن استام تەلەارنالار، سونىڭ ىشىندە تايۆان، گونكونگ، مالايزيا، تايلاند، سينگاپۋردىڭ كومپانيالارى قىزىعۋشىلىق تانىتىپ وتىر. مۋلتفيلمدى 2017-جىلدىڭ ەكىنشى جارتىسىندا استانادا ەكسپو-2017 اشىلعان كەزدە قىتايدا (CCTV)، قازاقستاندا جانە باسقا ەلدەردە دە ءبىر ۋاقىتتا كورسەتۋدى جوسپارلاپ وتىرمىز.
ودان كەيىن مۋلتفيلمنىڭ كورىلىمى ءساتتى بولسا، ونىڭ تولىق مەتراجدى نۇسقاسىن شىعارساق دەگەن ويىمىز بار. وعان ماماندارىمىزدىڭ كۇشى جەتەدى دەپ سەنەمىن سەبەبى قازىر ءبىز ايتارلىقتاي جەتىستىكتەرگە جەتتىك. مىسالى، حاڭجوۋ جانە شياڭگاڭداعى ۇلكەن دارەجەدەگى انيماتسيا ماماندارى «ابايدىڭ بالالىق شاعى» مۋلتفيلمنىڭ ءبىرىنشى سەرياسىن كورىپ بىلاي دەدى: «شىنجاڭنان وسىنداي جوعارى ساپالى مۋلتفيلم شىعادى دەپ ويلاعان جوقپىز. سەندەر ۋاقىتتى 20 جىلعا قىسقارتتىڭدار». بۇل پىكىردى ەستىپ قاتتى قۋاندىق. ءبىراق ءبىز ودان دا جوعارى دەڭگەيگە جەتۋگە تىرىسامىز، ويتكەنى انيماتسيانىڭ شەگى بولمايدى.
جاقىندا عانا ءبىزدىڭ اباي اتىنداعى اكادەمياسىنىڭ ەكى وقۋشىسى ەرزات قۇرمەت ۇلى جانە تىلەك دۇيسەن ۇلى شىنجاڭ-ۇيعىر اۆتونوميالىق اۋدانىندا 100 انيماتور قاتىسۋىمەن وتكەن 3D- فورماتىنداعى مۋلتفيلمدەر بويىنشا سايىستا ءبىرىنشى جانە ەكىنشى دارەجەلى جۇلدەگە يە بولدى. ولار بۇكىل قىتايلىق سايىسقا جولداما الدى.
- اباي اتىنداعى انيماتسيالىق اكادەميا بۇل جوعارى وقۋ ورنى ما، قاشان قۇرىلدى؟
- بۇل جوعارى وقۋ ورنى 2015- جىلدىڭ شىلدەسىندە قۇرىلعان. ءبىزدىڭ كومپانياعا انيماتورلار قاتتى قاجەت بولعان كەزدە ءبىز ءوز قاراجاتىمىزدى ءبولىپ مامانداردى وقىتتىق. 2014- جىلعى قازاندا بەيجىڭگە كەلگەن داريعا نازاربايەۆا قىتايدا اباي ينستيتۋتتارىن اشۋ كەرەكتىگىن ايتتى. بۇل تۋرالى مالىمەتتى مەن قازاقپارات سايتىندا وقىپ، قاتتى قۋاندىم، بۇل بىزگە ۇلكەن اسەر، كۇش-قۋات جانە سەنىمدىلىك بەردى.
سودان كەيىن ءبىز وكىمەتىمىزگە انيماتورلىق جوعارى وقۋ ورنىن اشۋ تۋرالى ۇسىنىس جاسادىق. وكىمەتىمىز بىزگە شىنجاڭ جەڭىل ونەركاسىپ ۋنيۆەرسيتەتىنىڭ عيماراتىندا اباي اتىنداعى انيماتسيالىق اكادەمياسىن اشۋعا مۇمكىندىك بەردى. بىلتىر جيىرما وقۋشى قابىلداندى، بيىل وقۋشىلاردىڭ سانى ەكى ەسە ارتادى. بالالار ءتورت جىل وقىپ، «انيماتور» ماماندىعىنىڭ ديپلومىن الىپ شىعادى. ءبىزدىڭ اكادەميامىزدىڭ ارتىقشىلىعى - وقۋ بارىسىندا تەك 10 پايىز - نازاريا (تەوريا)، 90 پايىز - امەليات (تاجىريبە) بەرىلەدى. وقۋشىلار جاقسى وقىسا، ولاردى وقۋ بارىسىندا كومپانيامىزعا قىزمەتكەر رەتىندە قابىلدايمىز. بىزگە شاڭحاي جانە ىشكى قىتايدىڭ باسقا قالالارىندا وقىپ جاتقان بالالار وقۋعا تۇسۋگە قىزىعۋشىلىق تانىتىپ وتىر.
- كومپانياڭىزدا قانشا قىزمەتكەر جۇمىس ىستەيدى؟
- ءبىزدىڭ كومپانيامىزدا 30 ادام جۇمىس ىستەيدى. اباي اتىنداعى انيماتسيالىق اكادەميامىزدىڭ قىزمەتكەرلەرىن قوسساق 70 ادامنان اسادى. «ابايدىڭ بالالىق شاعى» مۋلتفيلمنىڭ قازاقشا نۇسقاسىنىڭ دۋبلياجىن قازاقستاننىڭ جاستار تەاترىنىڭ قىزمەتكەرلەرى جاسادى.
- ا ق ش، رەسەي، قازاقستان جانە تاعى باسقا شەت ەلدەردىڭ تاجىريبەسىن زەرتتەدىڭىزدەر مە؟
- قازاقستاندا شىققان بارلىق مۋلتفيلمدەردى قاراپ تالقىلايمىز - جاقسى جانە وسال جاقتارىن زەرتتەيمىز. مەن ەكى جىل بۇرىن امەريكاداعى ديسنەي كومپانياسىنا بارىپ تاجىريبەسىن زەرتتەپ كەلىسسوزدەر وتكىزدىم. ءبىزدىڭ بالالاردىڭ اعىلشىن ءتىلى دەڭگەيىن كوتەرگەننەن كەيىن امەريكاعا ءبىلىمىن جەتىلدىرۋگە جىبەرەمىز.
- اباي تۋرالى مۋلتفيلمنەن كەيىن قانداي جۇمىس جوسپارلانعان؟
- ءبىر ۇلتتىڭ قانداي ەكەندىگىن ءبىلۋ ءۇشىن ونىڭ مادەنيەتى مەن تاريحىنا قاراۋ كەرەك. ەگەر دە تاريحى دا مادەنيەتى دە جوعارى بولسا، بۇل ۇلتتىڭ تامىرى تەرەڭ دەگەن ءسوز. قازاق حالقىندا انيماتسيا ەتىپ جاسايتىن ۇلى تاريحى تۇلعالارىمىز جانە اڭىز اڭگىمەلەرىمىزدىڭ قاينارى وتە مول.
ءبىز جۇزدەگەن انيماتورلارمەن وسى جۇمىستى ونداعان جىلدار بويى اتقارساق تا، بىتىرە المايمىز. ابايدان كەيىن باسقا دا تاريحي تۇلعالار تۋرالى مۋلتفيلمدەردى ءتۇسىرۋ يدەيالارىمىز بار، ءبىراق «ابايدىڭ بالالىق شاعى» مۋلتفيلمىن تابىستى اياقتاۋ كەرەك. قىتاي وكىمەتى بىزگە قولداۋ كورسەتتى، ەندى قازاقستان تاراپىنان قولداۋ جاسالسا ءبىز ودان تىس تالاي جەتىستىكتەرگە تەز ارادا جەتەمىز دەپ سەنەمىن.
- اڭگىمەڭىزگە راحمەت، سىزگە تەك ساتتىلىك تىلەيمىن!
اۆتور: سادىق اكىجانوۆ
