پالەستينالىقتىڭ ءولىمى قوعامدا ۇلكەن قايشىلىق تۋعىزدى

استانا. قازاقپارات - يزرايل ساربازى پىشاقپەن ۇمتىلعان پالەستينالىقتى جەر جاستاندىردى. بۇل جاعداي قوعامدا ۇلكەن قايشىلىق تۋعىزىپ وتىر.

بىرەۋلەر اسكەري قىزمەتكەردىڭ ارەكەتىن قۇپتاسا، وزگەلەرى قازا تاپقان پالەستينالىقتىڭ جازىعى جوقتىعىن ايتادى. قازىر قىلمىستىق ءىس قوزعالىپ، ماسەلەنىڭ ءمان-جايى انىقتالىپ جاتىر. شابۋىل جاساعان پالەستينالىق ازامات 24 -ناۋرىزدا يزرايل ساربازىنىڭ قولىنان قازا تاپقان بولاتىن. قارۋ قولدانعان سەرجانت ەلور ءازاريدىڭ بۇل ارەكەتى قوعامدا قىزۋ تالقىلانۋدا.

ال اسكەري پروكۋراتۋرا جاراقات الىپ، جەردە جاتقان ادام ەش قاۋىپ توندىرمەگەن، سوندىقتان سارباز زاڭنان اتتادى دەپ وتىر. بۇل -  Amnesty International حالىقارالىق قوعامدىق قاۋىمداستىعىنىڭ عيماراتى. ەلدەگى تولقۋلار باستالماي تۇرىپ، بۇل مەكەمە يزرايل اسكەريلەرى قارۋ قولدانىپ، ادامداردى اياۋسىز جازالايتىندىعى تۋرالى بىرنەشە رەت حابارلاعان.

حەليال الوش، Amnesty International حالىقارالىق قاۋىمداستىعىنىڭ مۇشەسى:

- بۇگىندە پالەستينالىقتاردىڭ ءاربىر ارەكەتى ولىمگە اكەلۋى عاجاپ ەمەس. ءبىز ءدال قازىر بۇل ءىستىڭ سوڭىنا دەيىن وڭ شەشىمىن تاباتىنىنا سەنبەيمىز.

ەلور ازاريدىڭ جاقتاستارى ارنايى شەرۋ دە ۇيىمداستىرۋدا. ساربازدىڭ تۋىستارى تاعىلعان ايىپپەن كەلىسپەيدى.

ەتي ازاريي، ايىپتالۋشىنىڭ اپكەسى:

- ول اسكەر قاتارىنا قوسىلۋ ءۇشىن 16 جاسىنان سپورتپەن شۇعىلداندى. ول - ءوز وتانىن سۇيەتىن ناعىز پاتريوت. ەلور -  ءوزىنىڭ اكەسى مەن اتاسىنىڭ جولىن قۋىپ، ءىزىن جالعاستىرۋشى.

قازىر سەرجانت ءۇي قاماقتا وتىر. ەگەر سوت ونى ايىپتى دەپ تانىسا، ول 10 جىلعا دەيىن باس بوستاندىعىنان ايىرىلۋى مۇمكىن.

www.24.kz