اقتوبەدە قۇلاعى مەن قۇيرىعى سيىرعا ۇقسايتىن جىلقىلار ورناتىلا باستادى

استانا. قازاقپارات - اقتوبە كوشەلەرىندەگى قۇيرىعى مەن قۇلاعى سيىرعا ۇقساس جىلقىلاردىڭ ءمۇسىنى تۇرعىنداردىڭ تۇسىنىسپەۋشىلىگىن تۋدىردى. بىرەۋلەرى مۇنى «مۇسىنشىلەردىڭ قاتەلىگى» دەپ سانايدى دەپ جازادى كەرەك- ينفو.

ەندى بىرەۋلەر قالانى اباتتاندىرۋعا جاۋاپتى مەكەمە باسشىلارىن تىلدەپ الەك. قالا كوشەلەرىندە قۇيرىعى سيىرعا ۇقساس جىلقىلار قايدان جانە قالاي پايدا بولدى؟

اقتوبەدەگى جول پوليتسياسى عيماراتى مەن يپپودرومعا جاقىن ماڭدا «جايىلىپ جۇرگەن» جىلقىلاردىڭ ءمۇسىنى پايدا بولعانىنا اسا كوپ بولا قويعان جوق. اڭعارىمپاز اقتوبەلىكتەردىڭ ءبىرى ازامات الاگوزوۆ كەرەك.info تىلشىسىنە حابارلاسىپ، ۇيىردەگى كەي جىلقىلاردىڭ قۇيرىعى مەن قۇلاعى تۇلپاردان گورى سيىرعا كەلىڭكىرەيتىنىن ايتتى.

ەكى- ءۇش جىلدان بەرى ءوزى دە مۇسىنشىلىكپەن اينالىسا باستاعان ازامات الاگوزوۆ «بۇل مۇسىندەردى اتقا ءمىنىپ كورمەگەن، جىلقىنى تەك سۋرەتتەن عانا كورگەن ادام سالعان» دەپ بولجايدى.

تىلشىلەر جول پوليتسياسى عيماراتى مەن يپپودرومعا جاقىن ماڭداعى مۇسىندەردى ءوز كوزىمەن كورىپ قايتتى. قالانىڭ ەكى بولىگىندەگى مۇسىندەر ءبىر بىرىنە وتە ۇقساس. ءتىپتى ءبىرىن ەكىنشىسىنىڭ قالىبىمەن قۇيا سالعانداي. جالپى سانى 10 ءمۇسىن. ونىڭ تورتەۋى يپپودروم ماڭىندا. التاۋى جول پوليتسياسى عيماراتى ماڭىنا ورنالاستىرىلعان.

جىلقى مەن قۇلىننىڭ ورتاسىندا باسىن تومەن سالىپ تۇرعان حايۋان شىندىعىندا دا تۇلپارعا مۇلدەم ۇقسامايدى. اسىرەسە، قۇلاعى مەن قۇيرىعى مەنمۇندالاپ تۇر. سيىر قۇيرىق حايۋاندى اسىقپاي اينالشىقتاي ءجۇرىپ، سالدەن كەيىن عانا زەبرا ەكەنىن اڭعاردىق.

جۇرتتىڭ شاتاساتىنداي- اق ءجونى بار. ويتكەنى، زەبرالاردىڭ مۇسىندەرى اق جانە قارا تۇسكە بويالماعان. يپپودروم جانىنداعى «ءبىرتۇرلى» جىلقىلاردى قىزىلجار اۋىلىنىڭ تۇرعىنى جومارت ەلەمەسوۆ تە بايقاپتى.

«و زاماندا بۇ زامان زەبرانى كىم كورىپتى؟ تەلەديداردان كورەتىنىمىز راس. ءبىراق تەلەديدارداعى زەبرالاردىڭ ءتۇسى قارا- الا بولۋشى ەدى. قىرۋار اقشا شىعارىپ قۇيدىرعان ەكەن جۇرتتى شاتاستىرماي زەبرانى بوياي سالۋلارى كەرەك ەدى. ايتپەسە، وتكەن- كەتكەن سايىن تۇك جازىعى جوق ءمۇسىنشىنى تىلدەپ ءجۇرمىز» - دەيدى جومارت.

مۇسىندەردىڭ كەيبىرى جەڭىس جۇبانعوسوۆتىڭ قولىنان شىققان. ءمۇسىنشىنىڭ سوزىنە قاراعاندا، ول ەكى ۇيىردەگى قۇلىنداردىڭ عانا اۆتورى. ال زەبرالار مەن ءىرى جىلقىلاردىڭ اۆتورى كىم ەكەندىگىنەن حابارسىز. بىلەتىنى - بۇل مۇسىندەر وسىدان ءۇش جىل بۇرىن قۇيىلعان. جەڭىس جۇبانعوسوۆ «ارنايى بوياۋى اقتوبەگە كەلىپ بولماعاندىقتان، زەبرالار ۋاقىتىندا بويالماي قالدى» دەيدى.

زەبرا دا جىلقىنىڭ ءبىر تۋىسى. افريكانىڭ اشىق دالالى القاپتارىنان اقتوبەگە «توپ ەتە قالعان» حايۋانداردىڭ ءوزىن جىعا تانىماسا دا اقتوبەلىكتەرگە قۇيرىعى تانىس كورىنگەن. ويتكەنى، زەبرانىڭ قۇيرىعى شىندىعىندا دا سيىرعا ۇقساس

 

 

دەرەككوز: Nur.kz