الماتىلىق جىگىت الەۋمەتتىك جەلىدە جالعان اتپەن تانىسقان قىزىن سوتقا بەردى

استانا. قازاقپارات - الماتى وبلىسىندا قىزىق وقيعا ورىن الدى.

ۆكونتاكتە الەۋمەتتىك جەلىسىندە جالعان ەسىممەن تانىسقان قىزدىڭ ۇستىنەن الماتىلىق جىگىت ىلە اۋداندىق سوتىنا شاعىم ءتۇسىردى، - دەپ حابارلايدى «قامشى» پورتالى.

جىگىت جەلىدە تانىسقان قىزبەن ءبىراز ۋاقىت حابارلاسىپ جۇرگەن. قىزدىڭ جازعان سوزدەرى مەن جەلىگە جۇكتەگەن سۋرەتتەرىنە ءتانتى بولعان جىگىت ونىمەن جاقىن تانىسۋعا ارەكەت جاساعان. كەزدەسۋگە شاقىرعان جىگىتتەن قىز بىردەن تاتەسىنىڭ تۋعان كۇنىنە 20 مىڭ تەڭگەلىك گۇل شوعىن جانە 30 مىڭ تەڭگە اقشا اكەلىپ بەرۋىن سۇراعان. گۇلىن قۇشاقتاپ، 30 مىڭدى قالتاعا باسقان جىگىت ىلە اۋدانىنىڭ جەتىگەن اۋىلىنا كەلگەندە تانىسقان قىزىنىڭ مۇلدەم باسقاشا كەيپىن كورىپ، شالقاسىنان تۇسەدى.

ىلە اۋداندىق پروكۋراتۋراسى حابارلاعانداي، جەتىگەندىك 23 جاستاعى قىزدىڭ باسقا دا الاياقتىق ارەكەتتەرگە قاتىسى بارى انىقتالىپ وتىرعان كورىنەدى. ول ەلدەن بالاباقشا، وقۋعا ءتۇسۋ سىندى ماسەلەلەردى شەشىپ بەرەمىن دەپ ءىرى كولەمدە اقشا الىپ كەلگەن. ءتىپتى، ءبىر كەلىنشەك وعان بانكتەن 450 مىڭ تەڭگە نەسيە الىپ بەرگەن، ول ازداي بار التىنىن لومباردقا قويىپ، تاعى 150 مىڭ تەڭگەنى قولىنا ۇستاتقان.

«سوتقا دەيىنگى تەرگەۋ كەزىندە ايىپتالۋشىنىڭ بىرنەشە الاياقتىق وقيعاسىنا قاتىسى بارى دالەلدەندى. ول ارەكەتتەردەن ازاماتتارعا كەلتىرىلگەن شىعىننىڭ جالپى قۇنى 1,5 ميلليون تەڭگەدەن اسادى. سوتتا كۇدىكتىنىڭ كىناسى دالدەنسە ول 3 جىلدان 7 جىلعا دەيىن باس بوستاندىعىنان ايىرىلۋى مۇمكىن»، - دەيدى ىلە اۋدانىنىڭ پروكۋرورى مۇحتار مىڭجاسار.

پروكۋراتۋرا قىزمەتكەرلەرى وسى ءىس بويىنشا جاقىن كۇندەرى سوت پروتسەسى باستالاتىنىن حابارلادى. كۇدىكتىدەن ازىرگە قولحات الىنىپ، قاماۋ شاراسى قولدانىلماعان.