وليمپيادا چەمپيونى ەرماحان ىبىرايىموۆ گولوۆكين قاي راۋندتا جەڭىسكە جەتەتىنىن ايتتى
(Super) ، IBO، WBC (Interim) جانە IBF نۇسقالارى بويىنشا ورتا سالماقتاعى الەم چەمپيونى، قازاقستاندىق گەنناديي گولوۆكين (34-0, 31 ك و) 23 -ءساۋىر كۇنى (استانا ۋاقىتىمەن 24 -ءساۋىر) امەريكالىق بوكسشى دومينيك ۋەيدكە (18-0, 12 ك و) قارسى جەكپە-جەككە شىعادى.
سيدنەي وليمپياداسىنىڭ چەمپيونى ەرماحان ىبرايىموۆ گولوۆكين- ۋەيد جەكپە-جەگىنە قاتىستى جاساعان بولجامىمەن ءبولىستى.
«گەننادي گولوۆكين امەريكالىق بوكسشى دومينيك ۋەيدكە قارسى جەكپە-جەكتىڭ بەسىنشى راۋندىندا جەڭىسكە جەتەدى. قارسىلاسىنىڭ ۇزاققا شىداي قويۋى ەكىتالاي. جالپى، مەنىڭ ۋەيدكە قاتىستى پىكىرىم ەكىۇشتى. ءبىر جاعىنان، ۋەيد - ءبىزدىڭ بوكسشىمىزعا لايىق قارسىلاس ەمەس. قازىرگى تاڭدا گەنناديمەن تەڭ ۇرىسۋعا ءتورت-اق بوكسشىنىڭ شاماسى كەلەدى. ولار - ساۋل الۆارەس، فلويد مەيۆەزەر، سەرگەي كوۆاليەۆ جانە دميتري پيروگ.
ال، ۋەيدكە گەنانىڭ دەڭگەيىنە جەتۋ ءۇشىن ءالى ءوسۋ قاجەت. ەكىنشى جاعىنان، گەنناديي سەكىلدى الەمدەگى ۇزدىك بوكسشىلاردىڭ بىرىنە قارسى شىعۋدان جۇرەكسىنبەۋى - ءۋەيدتىڭ دە باتىل جىگىت ەكەنىن كورسەتەدى. سول ءۇشىن دە ونى گەناعا لايىقتى قارسىلاس دەپ ەسەپتەۋگە بولاتىن شىعار...»، - دەيدى ە. ىبرايىموۆ.
ايتا كەتەيىك، جەكپە- جەكتى 24 -ساۋىردە 07:20 دان باستاپ «قازاقستان» ۇلتتىق تەلەارناسى مەن kaztrk.kz سايتى تىكەلەي ەفيردە كورسەتەدى. «قازمەديا ورتالىعىنىڭ» لەد- ەكراندارىنان تاماشالاي الۋ مۇمكىندىكتەرىڭىز بار.
