التى مىڭ شاقىرىم جول جۇرگەن گرۋزيالىق ۆەلوسيپەدشى بۇگىن الماتىعا كەلدى
«مەن ءۇش اي جول ءجۇردىم. 22 -قاڭتار كۇنى تبيليسي قالاسىنان شىعىپ، باكۋ، تەگەران، اشحاباد، بۇحارا، ءدۇشانبى، تاشكەنت، شىمكەنت، بىشكەك جانە باسقا دا قالالاردا بولىپ، ۆەلوساياحاتىمدى بۇگىن الماتىدا اياقتادىم»، - دەدى ن. بوريدزە.
ول سونىمەن قاتار، بۇل ۆەلوتۋردىڭ دايىندىق ەكەنىن ايتتى. ويتكەنى، الداعى 9 مامىردا ۆلاديۆوستوك قالاسىندا «سپورت بەيبىتشىلىك ءۇشىن» جوباسىنىڭ №7-ۆەلوماروفونى باستالادى.
«مەن ەۋروپا، افريكا، ازيا ەلدەرىن ارالاپ ءوتىپ، 2018 -جىلى تبيليسيگە ورالۋدى جوسپارلاپ وتىرمىن. وندا سپورت شەرۋى جانە بەيبىتشىلىك وليمپياداسى بولادى»، - دەدى ول.
ونىڭ ايتۋىنشا، ۆەلوساياحاتتىڭ باستى ماقساتى - سالاماتتى ءومىر سالتىن، ۆەلوسپورتتى جانە ارينە بەيبىتشىلىك، كەلىسىم، ءوزارا سىيلاستىق سەكىلدى قۇندىلىقتاردى ناسيحاتتاۋ.
«بۇگىندە الەمدە قارجى داعدارىسى ۋشىعىپ تۇر. ءار جەردە قارۋلى قاقتىعىستار بولىپ، ادامدار زارداپ شەگىپ جاتىر. ال نەگىزى قازاقستانداعى سەكىلدى ۇلتارالىق تاتۋلىق بولۋى قاجەت. قازاقستاندىقتار وتە قوناقجاي حالىق. الماتىدا بۇقارالىق ۆەلوسپورتتى دامىتۋ ءۇشىن كوپتەگەن شارالار جۇزەگە اسىرىلىپ جاتىر. ويتكەنى، ۆەلوسيپەد تەبۋ - ادامنىڭ دەنساۋلىعىن نىعايتۋعا، كوڭىل- كۇيىن كوتەرۋگە، ەكولوگيانى جاقسارتۋعا سەپتىگىن تيگىزەدى»، - دەدى ن. بوريدزە.
الماتىدا ۆەلوساياحاتشى بىرنەشە كۇن بولىپ، گرۋزين دياسپوراسىنىڭ وكىلدەرىمەن كەزدەسۋدى جوسپارلاپ وتىر. سونداي- اق، 23 -ساۋىردە الماتىلىق ۆەلواۋەسقويلاردىڭ ۇيىمداستىرۋىمەن وتەتىن 200 شاقىرىمدىق ۆەلوشەرۋگە قاتىسادى.
اۆتور: ايبوتا جاپپاربەرگەن
