اۋعانستاننىڭ اسكەرى مەن مينيسترلىكتەرى قازاقستان استىعىنىڭ تۇتىنۋشىسىنا اينالۋدا
بۇل تۋرالى بۇگىن ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا قازاقستاننىڭ اۋعانستان يسلام رەسپۋبليكاسىنداعى توتەنشە جانە وكىلەتتى ەلشىسى ءومىرتاي ءبىتىموۆ ءمالىم ەتتى.
ونىڭ سوزىنە قاراعاندا، استىقتى كوممەرتسيالىق نەگىزدە ءتۇرلى بيزنەسمەندەر جەتكىزىپ جاتىر. سونىمەن قاتار، اۋعان ازاماتتارى قازاقستانعا ارنايى كەلىپ، استىق ساتىپ الۋدا.
«جالپى، بىزدەن 600 مىڭ توننا ءبيداي ساتىپ الىنادى. بۇل تۇرعىدا ماسەلەنىڭ ءمانىسى مەملەكەتتىك قاجەتتىلىكتەر ءۇشىن پەرسپەكتيۆالىق شارتتارعا قول قويۋعا بايلانىستى بولىپ وتىر. سەبەبى، اۋعانستاندا كۇش قۇرىلىمدارىنىڭ بلوگى وتە قۋاتتى. قازىرگى كەزدە كۇش قۇرىلىمداردا 341 مىڭ ادام قامتىلعان»، - دەپ توقتالدى ەلشى.
بۇدان بولەك، دەنساۋلىق ساقتاۋ جانە ءبىلىم مينيسترلىكتەرى دە ەلىمىزدىڭ تاۋارلارىن اۋقىمدى كولەمدە تۇتىنادى ەكەن.
«وسى ورايداعى جۇمىستار ەلىمىز ونىمدەرىنە اۋعانستانداعى سۇرانىستى رەتكە كەلتىرىپ، ءتيىستى شارالاردى قابىلداۋعا قاتىستى بولۋدا»، - دەدى ول.
ءو. ءبىتىموۆتىڭ ايتۋىنشا، استىق اقىسىز نەگىزدە جەتكىزىلمەيدى، تەك گۋمانيتارلىق اپاتتار كەزىندە عانا تەگىن بەرىلەدى. «اقىسىز نەگىزدە ءبىز تابيعي اپاتتار كەزىندە كومەكتەستىك. جىل سايىن ازىق-تۇلىكپەن، كيىم-كەشەكپەن، توسەك-ورىن جابدىقتارىمەن كومەك بەردىك»، - دەدى ول.
ەلشىنىڭ پايىمىنشا، ەكسپورتتى جانداندىرۋ ءۇشىن باستى پروبلەما - ول قاۋىپسىزدىك. «ءبىزدىڭ جەتكىزۋشىلەر ونداعى احۋالدان ءتيىستى دەڭگەيدە حاباردار ەمەس. سوندىقتان بەلسەندىلىكتى وسى ماسەلە تەجەپ تۇر»، - دەدى ول.
اۆتور: رۋسلان عابباسوۆ
