جامبىل وبلىسىندا كەنە شاققان ايەل ادام قايتىس بولدى

تاراز. قازاقپارات - جامبىل وبلىسىندا كونگو- قىرىم گەمورراگيالىق بەزگەك ۆيرۋسىن جۇقتىرۋ سالدارىنان بايزاق اۋدانىنىڭ تۇرعىنى قازا تاپتى،

 دەپ حابارلادى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن.

 مەديتسينالىق ۆەدومستۆونىڭ اقپاراتىنشا، 8 - ساۋىردە 30 جاستاعى ايەل بايزاق اۋدانى ورتالىق اۋداندىق اۋرۋحاناسىنا دەنە قىزۋىنىڭ جوعارىلاۋىنا، السىزدىك، باس اۋرۋى جانە وزگە دە سيمپتومدار بويىنشا شاعىمدانعان. دارىگەرلەر الدىن الا «كونگو- قىرىم گەمورراگيالىق بەزگەك» دياگنوزىن قويدى. 9 - ساۋىردە ناۋقاس تارازداعى وبلىستىق بالالارعا ارنالعان ينفەكسيالىق اۋرۋحاناعا كوشىرىلدى.

 ايەل ءۇي جانۋارلارىن كەنەلەردەن ارىلتۋ ءۇشىن ءدارى سەۋىپ ءجۇرىپ اۋرۋ جۇقتىرعان بولۋى مۇمكىن ەكەنى حابارلاندى. «كەنەنىڭ شاعۋىن جوققا شىعاردى، ولاردى ۇستاماعان، سىقپاعان. الايدا قان سىناماسى الىنىپ زەرتتەلگەندە، كونگو- قىرىم گەمورراگيالىق بەزگەك ۆيرۋسىن جۇقتىرعانى بەلگىلى بولدى. بىردەن نەگىزگى دەرتتىڭ سيمپتوماتيكالىق ەمدەۋى باستالدى»، - دەلىنگەن حابارلامادا.

 10 - ساۋىردە ناۋقاستى ينفەكتسيونيست- دارىگەر، قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى كافەدراسىنىڭ دوتسەنتى ل. دەريابينا تەكسەردى. دارىگەر دياگنوزبەن جانە ەمدىك شارالارىمەن كەلىستى.

 11 - ساۋىردە ناۋقاستىڭ جاعدايى كۇرت ناشارلادى. قابىلدانعان رەانيماتسيالىق شارالارعا قاراماستان، سول كۇنى كەشكە ازاماتشا اجال قۇشتى.

 دارىگەرلەر بايلانىسقا شىققان 30-دان استام ادام بار ەكەنىن، ولار باقىلانىپ جاتقانىن، جەتەۋى ستاتسيونارلىق باقىلاۋدا ەكەنىن ايتتى. جاعدايلارى قاناعاتتانارلىق. بايزاق اۋدانىندا ەپيدەميولوگتار كەنەنىڭ شاعۋ فاكتىلەرىن انىقتاۋ ماقساتىندا تەكسەرۋ جۇرگىزىپ جاتىر.

 وبلىستىق دەنساۋلىق ساقتاۋ باسقارماسىندا بايزاق اۋدانىندا بۇرىن كونگو- قىرىم گەمورراگيالىق بەزگەك اۋرۋى بايقالماعانىن، ەندى ول جامبىل وبلىسىنداعى كونگو- قىرىم گەمورراگيالىق بەزگەك ۆيرۋسىنىڭ تابيعي وشاقتارى تىزىمىنە ەنگىزىلەتىنىن اتاپ ءوتتى.