استانا كوشەلەرىندە الما مەن المۇرت كوشەتتەرى وتىرعىزىلادى

استانا. قازاقپارات - استانا قالاسىندا كوشەلەرگە جەمىس اعاشتارىن، سونىڭ ىشىندە الما مەن المۇرت كوشەتتەرىن وتىرعىزۋ جۇمىستارى جۇرگىزىلۋدە.

 بۇل تۋرالى بۇگىن پرەسس- تۋر بارىسىندا استانا قالالىق تابيعي رەسۋرستار باسقارماسىنىڭ باسشىسى ادىلبەك سارسەمبايەۆ ءمالىم ەتتى.

باسقارما باسشىسىنىڭ سوزىنە قاراعاندا، ەلوردادا جىل سايىن وتىرعىزىلاتىن كوشەتتەر الاڭى اۋقىمدانىپ، باس قالا جاسىل قالاعا اينالىپ كەلەدى. دەگەنمەن، تەز قۇبىلاتىن استانا كليماتىنا نەگىزىنەن قىلقان جاپىراقتى اعاشتار وسىرىلەدى.

«ءبىراق، ءبىز قازىردىڭ وزىندە الما، المۇرت سەكىلدى جەمىس اعاشتارىن وتىرعىزعىمىز كەلەدى. بۇلار ەلورداداعى وسىمدىكتەر دۇنيەسىنە ارالاسۋى كەرەك. الداعى ۋاقىتتا الما كوشەتتەرى قالانىڭ كوشەلەرىندە پايدا بولادى دەپ جوسپارلادىق»، - دەدى ءا. سارسەمبايەۆ.

ونىڭ ايتۋىنشا، قازىرگى كۇنى استانادا جاسىل كوشەتتەردى سانيتارلىق كەسۋگە رۇقسات تەك كارى، قۇرت تۇسكەن اعاشتارعا، سونىمەن بىرگە ينجەنەرلىك جەلىلەر مەن كولىكتىك ينفراقۇرىلىمعا كەدەرگى كەلتىرگەندە عانا بەرىلەدى. بىلتىر وسىعان بايلانىستى 400-گە تارتا رۇقسات جاسالعان. «بۇل ءبىزدىڭ قاتاڭ باقىلاۋىمىزدا. ونىڭ ۇستىنە ءاربىر كەسىلگەن اعاشتىڭ ورنىنا جاڭا ەكى اعاشتان ەگىلەدى»، - دەدى باسقارما باسشىسى.

اۆتور: قانات مامەتقازى ۇلى