ق ر قارۋلى كۇشتەرىندە يراكتا قازا بولعان بىتىمگەرشىنى ەسكە الدى - فوتو

استانا. قازاقپارات - كەشە ق ر قارۋلى كۇشتەرىندە يراك رەسپۋبليكاسىندا بىتىمگەرشىلىك ميسسيانى ورىنداي وتىرىپ، بەيبىت ۋاقىتتا قازا بولعان قازاقستاندىق ارميانىڭ بىردەن- ءبىر وفيتسەرى كاپيتان قايرات قۇدابايەۆتى ەسكە الۋدا.

 بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.

كاپيتان قايرات قۇدابايەۆ قارۋلى كۇشتەردەگى قىزمەتى بارىسىندا ءوزىنىڭ باتىلدىعىن، جاۋاپكەرشىلىگى مەن ەرلىگىن كورسەتتى. مىڭداعان بەيبىت تۇرعىنداردىڭ قاۋىپسىزدىگىن قامتاماسىز ەتە وتىرىپ، ءوزىنىڭ قارۋلاستارىن اجال اۋزىنان امان الىپ قالىپ، باتىل ەرلىك جاسادى. 2005 -جىلدىڭ 9 - قاڭتارىندا يراكتاعى بەيبىتشىلىك ميسسيانى ورىنداۋ كەزىندە قازاقستان ءوزىنىڭ باتىرى، ق ر قارۋلى كۇشتەرىنىڭ ساردارى قايرات قۇدابايەۆتان ايىرىلدى.

«2004 -جىلى ءبىز قايراتپەن بىتىمگەرشىلىك ميسسيانى ورىنداۋ ءۇشىن يراكقا جولداندىق. قازاقستاننان 8 اسكەري قىزمەتشى بولدىق جانە ۋكراينادان 35-تەي اسكەري قىزمەتشى بولدى. ول جەردە ءبىز جەردى تازارتۋ جانە مينالار مەن وق- دارىلەردى جويۋمەن اينالىستىق. ميسسيا وتە كۇردەلى بولدى، تىنىشتىق قاشقان الماعايىپ كەزەڭ بولدى. قايرات ۇيىمداسقان، ساۋاتتى وفيتسەر بولدى. قارۋلاستارىنا ۇنەمى قولۇشىن سوزۋعا دايىن تۇراتىن. ول اعىلشىن ءتىلىن بىلەتىن، جاساق كومانديرىمەن شەتەلدىكتەرمەن وتەتىن بريفينگتەر مەن كەڭەستەرگە قاتىساتىن. 2005 -جىلعى 9 - قاڭتاردا ءبىز جەردى وق- دارىلەردەن تازارتۋ ءۇشىن كەزەكتى ۋچاسكەگە باردىق. وپەراتسيا كەزىندە جارىلىس ورىن الدى. كاپيتان قايرات قۇدابايەۆ ءبىزدى جارىلىس وشاعىنان يتەرىپ جىبەرىپ، قۇتقارىپ قالدى. ەرلىكپەن قازا تاپتى. 2016 -جىلدىڭ 19 - ساۋىرىندە ول 41 جاسقا تولار ەدى. قايراتتىڭ ەرلىگىن ءبىز ەشقاشان ۇمىتپايمىز»، - دەدى كاپيتان قايرات قۇدابايەۆتىڭ قىزمەتتەسى، 61993 اسكەري ءبولىمى كومانديرىنىڭ ورىنباسارى ۇلان مايورى اسقار سماعۇلوۆ.

اسكەري جانە قىزمەتتىك مىندەتىن ورىنداۋ كەزىندە كورسەتكەن باتىلدىعى مەن قايسارلىعى ءۇشىن قازاقستان رەسپۋبليكاسى پرەزيدەنتىنىڭ جارلىعىمەن كاپيتان قايرات قۇدابايەۆ قايتىس بولعاننان كەيىن ءبىرىنشى دارەجەلى «ايبىن» وردەنىمەن جانە پولشا، ۋكراينا، ا ق ش قارۋلى كۇشتەرىنىڭ كوپتەگەن وزگە دە ناگرادالارىمەن ماراپاتتالدى.

بۇگىن الماتى مەن قاپشاعايدا قازاقستان قارۋلى كۇشتەرىنىڭ اسكەري قىزمەتشىلەرى ەستەلىك شارالار وتكىزدى. اسكەري قىزمەتشىلەر 32363 اسكەري بولىمىندە ورنالاسقان قايرات قۇدابايەۆتىڭ مۇسىنىنە گۇل شوقتارىن قويدى. سونداي- اق ءبولىم اۋماعىندا قازا بولعان وفيتسەردى ەسكە الۋ بۇرىشىن اشتى. قر قك ايەروۇتقىر اسكەرلەرىنىڭ قولباسشىسى گەنەرال- مايور الماز جۇماكەيەۆتىڭ باسشىلىق ەتۋىمەن ب. مومىش ۇلى اتىنداعى رەسپۋبليكالىق اسكەري مەكتەپ- ينتەرناتىندا قايرات قۇدابايەۆتى ەسكە الۋ كۇنى ءوتتى. وندا «بىتىمگەرشىلەر» فيلمى كورسەتىلىپ، وپات بولعان وفيتسەرگە ارنالعان كونسەرت وتكىزىلدى.