قازاقستاندىق سپورتشىلاردىڭ التى تاڭبالى جالاقىسى دەپۋتات تىنىكەيەۆتىڭ اشۋىن كەلتىردى
ماجىلىسمەننىڭ ايتۋىنشا، ءبىر عانا فۋتبولشى اندرەي ءارشاۆيننىڭ ءوزى 1 ميلليون دوللاردان استام جالاقى الادى. تىنىكەيەۆ ونداي سپورتتىڭ قازاقستانعا ەش قاجەتى جوقتىعىن ايتىپ، بۇل قاراجاتتى بالالار سپورتىن دامىتۋ مەن سپورت الاڭدارىن اشۋعا جۇمساۋ كەرەكتىگىن العا تارتتى.
«كەشە سەمەيدە قازاقستان چەمپيوناتى ءبىتتى. 350 دەن استام قاتىسۋشى تىركەلدى. ودان كەيىن قاراعاندىدا، شاحتينسكىدە چەمپيوناتتار وتكىزىلدى. بۇل ءىس- شارالارعا مەملەكەت تاراپىنان ەش قولداۋ كورسەتىلمەدى. ال ەندى وزگە سپورت تۇرلەرىنە نازار اۋدارايىقشى» ، - دەپ باستادى دەپۋتات.
«ارشاۆينگە (اندرەي ارشاۆين - "قايرات" كلۋبىندا وينايتىن رەسەيلىك فۋتبوليست) 1 ميلليون دوللاردان استام جالاقى تولەنەدى. كەي لەگيونەرلەردىڭ جالاقىسى 30 مىڭ دوللار. بىزگە مۇنداي فۋتبول كەرەك پە؟ وسىنداي سپورتتىڭ قانشا قاجەتتىلىگى بار؟ بۇل قاراجات نە سەبەپتى بالالار سپورتىنا، الاڭداردىڭ اشىلۋىنا جۇمسالمايدى؟ ىشىندە جالعىز قازاقستاندىق - مەنەدجەر سلاۆا تيحونەنكو بولىپ تابىلاتىن ءارى قىرۋار اقشانى قاجەت ەتەتىن باسكەتبولدىڭ بىزگە نە قاجەتى بار؟ » ، - دەپ قوستى تىنىكەيەۆ.
دەپۋتات «مۇزعا تەك توبەلەس اشۋ ءۇشىن شىعاتىن» «بارىس» حوككەي كلۋبىندا دا ءدال سونداي جاعداي ەكەنىن ءسوز ەتتى.
«12-13 -جىلعى ماۋسىم مالىمەتتەرى بويىنشا، ەكى حوككەيشىنىڭ جالاقىسى ءبىر ميلليون 300 مىڭ دوللاردان 1,8 ميلليون دوللارعا دەيىن بارعان. ءتورت حوككەيشى 900 مىڭ دوللاردان 1,3 ميلليون دوللارعا دەيىن العان. ءبىر ادام عانا. ەلەستەتىپ كورىڭىزشى. نە ءۇشىن؟ ونداي سپورت نەگە كەرەك؟ وسى ءۇشىن جاۋاپتىلار قورىتىندى جاساسىن» ، - دەيدى تىنىكەيەۆ.
ماجىلىسمەن فۋتبولدى ەلىمىزدە «فۋتبوليستەر ەمەس، وبلىس اكىمدەرى وينايتىنىن» العا تارتتى. ءار وبلىس اكىمى - فۋتبول فەدەراتسياسىنىڭ پرەزيدەنتى.
«حوككەي، فۋتبولدان جەكە قازاقستان چەمپيوناتىن ۇيىمداستىرايىق تا ۇزدىكتەرىن تاڭدايىق. 10 ادام جۇگىرىپ جۇرگەنىنە، ونىڭ ىشىندە بىرەۋى عانا قازاقستاندىق بولعانىنا قاراپ وتىرا بەرمەيىك. ءبىرجولا ءتارتىپ ورناتايىق. رەسپۋبليكالىق وداق بار، ولارعا رەتتەۋ جۇرگىزۋ مۇمكىندىگىن بەرەيىك» ، - دەپ ءتۇيدى ول.
