ا. باتالوۆ: الماتى وبلىسىندا ءۇش اۋىسىمدا وقيتىن مەكتەپتەر بولمايدى
بۇل تۋرالى بۇگىن «مەملەكەت باسشىسىنىڭ 5 ينستيتۋتتىق رەفورماسىن جۇزەگە اسىرۋ بويىنشا 100 ناقتى قادام» ۇلت جوسپارىن جۇزەگە اسىرۋ ماسەلەلەرىنە ارنالعان باسپا ءسوز ءماسليحاتى بارىسىندا اتالعان ءوڭىردىڭ باسشىسى اماندىق باتالوۆ ءمالىم ەتتى.
«ەكونوميكالىق ىنتىماقتاستىق جانە دامۋ ۇيىمى (ە ى د ۇ) ەلدەرىنىڭ ستاندارتتارى اياسىندا جوعارعى سىنىپتار كەزەڭ- كەزەڭىمەن 12 جىلدىق ءبىلىم بەرۋگە كوشىپ، ءبىلىم سالاسى جان باسىنا قارجىلاندىرىلادى، سونداي-اق مەكتەپتەردە ءۇش تىلدە وقىتۋدى ەنگىزۋ جوسپارلانۋدا. 2013 -جىلدان بەرى تالعار اۋدانىنىڭ ءتورت مەكتەبىندە (م. اۋەزوۆ اتىنداعى №5 ورتا مەكتەبى، ت. رىسقۇلوۆ اتىنداعى №14 ورتا مەكتەبى، №16 ورتا مەكتەبى، №49 ورتا مەكتەبى) جان باسىن قارجىلاندىرۋدىڭ پيلوتتىق جوباسى جۇرگىزىلۋدە. 2013-2014 وقۋ جىلى 1-سىنىپتان باستاپ، ال 2015-2016 وقۋ جىلىنان باستاپ، 1-3-سىنىپتاردا اعىلشىن ءتىلىن وقىتۋ ەنگىزىلدى»، - دەپ حابارلادى ايماق باسشىسى.
ا. باتالوۆ اتاپ وتكەندەي، بيىلدان باستاپ، جاڭا وقۋ باعدارلاماسىن ەنگىزۋ ءۇشىن ايماققا قاراستى التى مىڭنان استام مۇعالىم بىلىكتىلىگىن ارتتىرماق.
«سونداي-اق، 2016-2017 وقۋ جىلدارى وبلىستا 43 مەكتەپ سالا وتىرىپ، اپاتتى جاعدايدا تۇرعان جانە ءۇش اۋىسىمدا وقيتىن مەكتەپتەردىڭ ماسەلەسىن شەشەمىز»، - دەپ تولىقتىردى وبلىس اكىمى.
