الماتى وبلىسىندا مەملەكەتتىك قىزمەتشىلەردىڭ ەڭبەكاقىسىن قىزمەت ناتيجەلەرىنە قاراي ارتتىرۋ كوزدەلگەن - ا. باتالوۆ

تالدىقورعان. قازاقپارات - الماتى وبلىسىندا مەملەكەتتىك قىزمەتشىلەردىڭ ەڭبەكاقىسىن قىزمەت ناتيجەلەرىنە قاراي ارتتىرۋ كوزدەلگەن.

بۇل تۋرالى بۇگىن «مەملەكەت باسشىسىنىڭ 5 ينستيتۋتتىق رەفورماسىن جۇزەگە اسىرۋ بويىنشا 100 ناقتى قادام» ۇلت جوسپارىن جۇزەگە اسىرۋ ماسەلەلەرىنە ارنالعان باسپا ءسوز ءماسليحاتىندا اتالعان ءوڭىردىڭ باسشىسى اماندىق باتالوۆ ءمالىم ەتتى.

«مەملەكەتتىك قىزمەت تۋرالى» زاڭعا سايكەس، مەملەكەتتىك قىزمەت جۇيەسىن قۇرۋدىڭ مانساپتىق قاعيداسى ەنگىزىلدى. ونىڭ اياسىندا الدىڭعى ورىنعا مەملەكەتتىك قىزمەتشىلەردىڭ قۇزىرەتى مەن جەكە قاسيەتتەرى شىعارىلادى، ال مانسابىنىڭ ءوسۋى ءۇشىن تومەنگى لاۋازىمداردا جۇمىس تاجىريبەسىنىڭ بولۋى مىندەتتى. قىزمەتكە العاشقى رەت كىرىسەتىندەر مىندەتتى سىناق مەرزىمىنەن وتەدى. جىل باسىنان بەرى وبلىس بويىنشا تومەنگى لاۋازىمدارعا ورنالاسۋعا 69 جالپى كونكۋرس جاريالاندى، ولاردىڭ ناتيجەسى بويىنشا 15 ادام تاعايىندالدى. 28 مەملەكەتتىك قىزمەتشى سىناق مەرزىمىنەن وتۋدە»، - دەدى ول.

ءوڭىر باسشىسىنىڭ ايتۋىنشا، اشىقتىق پەن وبەكتيۆتىلىكتى قامتاماسىز ەتۋ ءۇشىن بارلىق كونكۋرستىق كوميسسيالاردا قاداعالاۋشىلار قاتىسادى. 5-6-قادامدارعا سايكەس مەملەكەتتىك قىزمەتشىلەردىڭ ەڭبەكاقىسىن قىزمەت ناتيجەلەرىنە قاراي ارتتىرۋ كوزدەلگەن. وسىعان بايلانىستى «ا» كورپۋسىنداعى اكىمشىلىك مەملەكەتتىك قىزمەتشىلەرمەن كەلىسىمدەر جاسالدى.

«ب» كورپۋسىنىڭ اكىمشىلىك مەملەكەتتىك قىزمەتشىلەرىنىڭ قىزمەتىن باعالاۋ ادىستەمەسى بەكىتىلدى، مەملەكەتتىك قىزمەتشىلەر جۇمىسىنىڭ 3755 جەكە جوسپارلارى جاسالىپ، ولاردى باعالاۋ جونىندەگى كوميسسيالار قۇرىلدى.

«سەگىزىنشى قادامنىڭ اياسىندا مەملەكەتتىك قىزمەتشىلەردىڭ اۋىسۋى كەزىندە تۇرعىن ۇيمەن قامتاماسىز ەتۋ ماسەلەسى شەشىلۋدە. بۇگىنگى تاڭدا وبلىس بويىنشا 139 بىرلىك قىزمەتتىك تۇرعىن ءۇي بار، تالدىقورعان قالاسىندا 55 پاتەرلى ءۇي سالىنىپ جاتىر. توعىزىنشى قاداممەن مەملەكەتتىك قىزمەتشىلەردى ءۇش جىلدا ءبىر رەت تۇراقتى وقىتۋ جۇيەسى بەلگىلەندى.

بەكىتىلگەن كەستە بويىنشا جىل باسىنان بەرى 76 مەملەكەتتىك قىزمەتشى وقىتىلدى، جىل سوڭىنا دەيىن تاعى 885 ادام نەمەسە بىلىكتىلىگىن ارتتىرۋى ءتيىس ادامداردىڭ - 25 پايىزى وقىتىلۋى قاجەت، وعان 40,5 ميلليون تەڭگە ءبولىندى»، - دەدى ا. باتالوۆ.

وبلىس اكىمىنىڭ سوزىنە قاراعاندا، 12-قادامعا سايكەس، مەملەكەتتىك قىزمەتشىلەردىڭ ەتيكاسىنا ەرەكشە كوڭىل بولىنۋدە، ەتيكا جونىندەگى ۋاكىلەتتى تاعايىندالدى. جەمقورلىق قۇقىق بۇزۋشىلىقتاردىڭ الدىن الۋ جانە بولدىرماۋ ماقساتىندا جەمقورلىقپەن كۇرەس جونىندەگى وڭىرلىك جوسپارلار قابىلداندى. بارلىق مەملەكەتتىك ورگانداردا سەنىم تەلەفوندارى ورناتىلدى، بۇقارالىق اقپارات قۇرالدارىندا ارنايى ايدار جۇرگىزىلۋدە.