ەلوردادا جەدەل جاردەم قىزمەتىنىڭ كەشىگىپ جەتۋىنىڭ سەبەبى ايتىلدى

استانا. قازاقپارات - بۇگىن استانا قالاسىنىڭ اكىمى ادىلبەك جاقسىبەكوۆتىڭ توراعالىعىمەن وتكەن ەلوردا اكىمدىگىنىڭ اپپارات وتىرىسىندا قالالىق دەنساۋلىق ساقتاۋ جۇيەسى جۇمىسىنداعى كەمشىلىكتەر تالقىلاندى،

دەپ حابارلايدى قالالىق اكىمدىكتىڭ باسپا ءسوز قىزمەتى.

ۇستىمىزدەگى جىلدىڭ اقپان ايىندا ەلوردا اكىمىنىڭ حالىقپەن ەسەپ بەرۋ كەزدەسۋىندە دەنساۋلىق ساقتاۋ باسقارماسىنا جەدەل جاردەم بريگاداسىنىڭ شاقىرۋلار بويىنشا جەتۋ ۋاقىتىن 10 مينۋتقا دەيىن ازايتۋ مىندەتى قويىلعان بولاتىن. جەدەل مەديتسينالىق جاردەم قىزمەتىن مودەرنيزاتسيالاۋ جونىندەگى كەشەندى جوسپار اياسىندا ەلوردا اكىمدىگى بارلىق قولايلى جاعدايدى جاساعانىنا قاراماستان «جەدەل جاردەم» جۇمىسىندا كەمشىلىكتەر بار. جەدەل جاردەم قىزمەتىنە قاتىستى شاعىمدار اكىمدىككە ءالى دە بولسا، ءتۇسىپ جاتىر. قالا تۇرعىندارىنىڭ ايتۋىنشا، جەدەل كومەكتى كۇتۋگە كوپ ۋاقىت كەتەدى.

قالا باسشىسىنىڭ تاپسىرماسىمەن جەدەل مەديتسينالىق جاردەم ستانسياسىنىڭ قىزمەتىنە تالداۋ جۇرگىزىلدى، سونىڭ اياسىندا قىزمەتكەرلەر بريگادالارمەن بىرگە شاقىرۋلارعا باردى. تالداۋ قورىتىندىسى بويىنشا وپەراتورلاردىڭ اقپاراتتى كەش بەرۋى مەن كەزەكشى اۋرۋحانالاردا ازاماتتاردى قابىلداۋدىڭ ساپاسىز ۇيىمداستىرىلۋى بويىنشا ەسكەرتۋلەر جاسالدى. بۇدان باسقا، جەدەل جاردەمنىڭ شاقىرۋلار بويىنشا كەش بارۋىنىڭ وبەكتيۆتى سەبەپتەرى دە بار، مىسالى جولدارداعى كەپتەلىستەر، «Bus Lane»  باقىلانبايتىن جولاقتارى، تۇرعىن ۇيلەر اۋماعىندا زاڭسىز ورناتىلعان شلاگباۋمدار. وسىعان بايلانىستى، ساۋلەت، تۇرعىن ءۇي ينسپەكتسياسى باسقارمالارىنا، اۋدان اكىمدىكتەرى مەن جەرگىلىكتى پوليتسيا قىزمەتىنە ەسكەرتۋلەردى جويۋ بويىنشا ءتيىستى تاپسىرمالار بەرىلدى.

وتىرىس بارىسىندا دەنساۋلىق ساقتاۋ سالاسى قالا اكىمدىگى قىزمەتىنىڭ باسىم باعىتى بولىپ قالاتىنى اتاپ ءوتىلدى. ەكونوميكالىق جاعدايدىڭ قيىندىعىنا قاراماستان دەنساۋلىق ساقتاۋ سالاسىن قارجىلاندىرۋ جىل سايىن ارتىپ كەلەدى. ەلوردادا جاڭا نىساندار بوي كوتەرىپ، ماتەريالدىق- تەحنيكالىق بازا جاقسارتىلۋدا، دەنساۋلىق ساقتاۋ سالاسى جۇيەسى ماماندارىنىڭ بىلىكتىلىگىن ارتتىرۋ بويىنشا شارالار قابىلدانىپ جاتىر. سونىمەن قاتار، جەدەل مەديتسينالىق جاردەم قىزمەتىن مودەرنيزاتسيالاۋ جونىندەگى كەشەندى جوسپار اياسىندا جەدەل جاردەم ماماندارىنىڭ الەۋمەتتىك- تۇرمىستىق جاعدايىن جاقسارتۋ بويىنشا قوسىمشا شارالار قاراستىرىلعان.

ەلوردا اكىمى ءوزىنىڭ ورىنباسارى ەرمەك امانشايەۆقا بارلىق اۋرۋحانالار مەن ەمحانالار بويىنشا مۇقيات تالداۋ جۇرگىزۋدى جانە جەدەل مەديتسينالىق جاردەم قىزمەتىنىڭ جۇمىسىن باقىلاۋعا الۋدى تاپسىردى.

«ەگەر ماسەلەلەر بار بولسا، ولاردى ايتىپ، شەشۋ كەرەك. ەشتەڭەنى دە جاسىرماڭىزدار»، - دەدى ءا. جاقسىبەكوۆ. ونىڭ ايتۋىنشا، قالالىق دەنساۋلىق ساقتاۋدىڭ ساپاسىن ارتتىرۋ بويىنشا جۇمىستار تۇراقتى تۇردە جۇرگىزىلۋگە ءتيىس. بۇعان ەڭ الدىمەن قالا تۇرعىندارى ءوز باعاسىن بەرۋى قاجەت.

مۇنىمەن قوسا، اپپارات وتىرىسىندا زاڭسىز ورناتىلعان ساۋدا نىساندارى بويىنشا ماسەلەلەر كوتەرىلدى. اتالعان نىساندار قالانىڭ كوركىن بۇزىپ، نىسان يەلەرى سالىق تولەۋدەن جالتارادى جانە ونى كۇتىپ ۇستاۋ ەرەجەلەرىن ساقتامايدى. قالا باسشىسى زاڭسىز ورناتىلعان وبەكتىلەردىڭ يەلەرىمەن ءتۇسىندىرۋ جۇمىستارىن جۇرگىزۋدى، ولاردى رەسمي تىركەۋ جانە سايكەسىنشە راسىمدەۋ مۇمكىندىگىن قاراستىرۋدى تاپسىردى.