بەيجىڭ وليمپياداسىنىڭ دوپينگ ءىسى اشىلسا، سالدارى قازاقستان سپورتشىلارىنا ءتيىپ كەتۋى دە مۇمكىن - ا. مۇحامەدي ۇلى
بۇگىن ماجىلىستە ءوتىپ جاتقان بۇقارالىق سپورتتى جانە دەنە شىنىقتىرۋدى دامىتۋ تاقىرىبىنداعى ۇكىمەت ساعاتىندا مادەنيەت جانە سپورت ءمينيسترى ارىستانبەك مۇحامەدي ۇلى وسىلاي ءمالىم ەتتى.
تالقىلاۋ بارىسىندا دەپۋتاتتار كاسىبي سپورتتاعى دوپينگ ماسەلەسىنە نازار اۋدارعان. «جاعداي ۋشىعىپ وتىر. ۇلكەن دەرجاۆا رەسەيدىڭ وزىندە ايگىلى سپورتشىلار اتاعىنان ايىرىلىپ جاتىر. بىزگە دە جەتىپ جاتىر. دوپينگكە ۇرىندىرمايتىن قانداي امال بار؟» دەگەن بولاتىن دەپۋتات ومارحان وكسىكبايەۆ.
ءوز كەزەگىندە مادەنيەت جانە سپورت ءمينيسترى ارىستانبەك مۇحامەدي ۇلى ءبىرازعا دەيىن ەلىمىزدە سپورتتىق مەديتسينا مەن دوپينگ سالاسىنا جەتكىلىكتى تۇردە كوڭىل اۋدارىلماي كەلگەنىن مويىندادى. ونىڭ ايتۋىنشا، تەك سوڭعى جىلدارى بۇل باعىتتاعى جۇمىستار جولعا قويىلا باستاعان. رەسپۋبليكالىق دوپينگكە قارسى ورتالىق استانا قالاسىنا كوشىرىلىپ، ەكى ءجۇز ميلليون تەڭگەگە ارنايى زەرتحانا اشىلاتىن بولادى.
«دوپينگ وتە كۇردەلى ماسەلە. سوڭعى ەكى جىل بويى وسى ماسەلەمەن اينالىسىپ كەلەمىز. ءبىزدىڭ سپورتشىلارىمىز دا وسىنداي ۇلكەن داۋلارعا ىلىككەن بولاتىن. سوندىقتان دا، قازاقستان دوپينگ ماسەلەسىن دۇرىس جولعا قويماسا، وندا الدا كەدەرگىلەر كوپتەپ شىعا بەرەدى. ەڭ وكىنىشتىسى، قازىر بەيجىڭ وليمپياداسىنا قاتىستى دوپينگ ءىسىن اشاتىنى تۋرالى ءسوز قوزعالىپ جاتىر. ەگەر بۇل اشىلسا، الەمدە كوپتەگەن ىڭعايسىز جاعدايلار ورىن الۋى مۇمكىن، ول قازاقستانعا دا قاتىستى بولۋى ىقتيمال. وسى تۇرعىدان العاندا، ءبىز ريو وليمپياداسىنا ەڭ ءبىرىنشى كەزەكتەگى دايىندىقتى دوپينگ سالاسىنان باستاپ وتىرمىز»، دەدى ۆەدومستۆو باسشىسى.
اۆتور: قانات مامەتقازى ۇلى
