مادەنيەت جانە سپورت ءمينيسترى مەكتەپتەگى دەنە شىنىقتىرۋ ساباقتارىن كوبەيتۋدى ۇسىنادى
بۇگىن ماجىلىستەگى بۇقارالىق سپورتتى جانە دەنە شىنىقتىرۋدى دامىتۋ تاقىرىبىندا وتكەن ۇكىمەت ساعاتىندا مادەنيەت جانە سپورت ءمينيسترى ارىستانبەك مۇحامەدي ۇلى وسى ماسەلەنى كوتەردى.
ءمينيستردىڭ ايتۋىنشا، سوڭعى ۋاقىتتا مەكتەپتەر اياسىندا سپورتتىق سەكتسيالار مەن كلۋبتار اشۋعا ەرەكشە ءمان بەرىلىپ كەلەدى. ماسەلەن، بۇگىنگى كۇنى مەكتەپتەردە وتىز مىڭنان استام سپورتتىق سەكتسيالار بار، وندا جالپى وقۋشىلار سانىنىڭ 27 پايىزى قامتىلعان.
«الايدا، اسىرەسە اۋىلدىق جەرلەردەگى مەكتەپتەردە سپورت زالدارىنىڭ، جابدىقتارىنىڭ جەتىسپەۋشىلىگىنەن سپورت زالدارى اشىلماي وتىر. بۇعان قاراماستان، بالالار مەن جاسوسپىرىمدەر سپورتىن دامىتۋعا كۇش سالىپ كەلەمىز»، دەدى ا. مۇحامەدي ۇلى.
ءمينيستردىڭ ايتۋىنشا، دامىعان ەلدەردە، سونىڭ ىشىندە ەكونوميكالىق ىنتىماقتاستىق جانە دامۋ ۇيىمى ەلدەرىندە بالالار مەن جاسوسپىرىمدەر سپورتىنا ەرەكشە ءمان بەرىلەدى.
«وسى ەلدەرگە قاراپ، ءبىز دە جاسوسپىرىمدەر اراسىنداعى سپورتتى دامىتۋعا ەرەكشە ءمان بەرۋىمىز كەرەك. اتاپ ايتقاندا، سالالىق زاڭناما مەن نورماتيۆتەر ارقىلى مەكتەپتەردەگى دەنە شىنىقتىرۋ ساعاتىن ءۇش ساعاتقا دەيىن جەتكىزۋ كەرەك. ەلباسى ەلدى ساۋىقتىرۋدا ەڭ الدىمەن قازاقستاننىڭ كەلەشەگى بولىپ تابىلاتىن بالالار مەن جاسوسپىرىمدى ساۋىقتىرۋ كەرەكتىگىن ۇدايى ايتىپ كەلەدى. ال قازىرگى كۇنى اۋىلداعى سپورت زالدارىنىڭ جەتىسپەۋشىلىگىن شەشۋدىڭ ءتۇرلى جولدارى دا بار»، - دەدى مينيستر ا. مۇحامەدي ۇلى.
اۆتور: قانات مامەتقازى ۇلى
