ءتىرى كەزىندە جانازاسى شىعارىلعان باتىرلار

استانا. قازاقپارات - قازاق داستۇرىندە العادايلاردىڭ جانازاسى ءتىرى كەزىندە شىعارىلاتىن بولعان. ارينە، بۇل ادەبي وڭدەۋدەن وتكەن اڭىزدىڭ سارقىنى عانا.

ءبىراق، قانشا ارتىق قوسپالارى مۇمكىن- اۋ دەگەننىڭ وزىندە دە وسىنداي سارقىننىڭ ار جاعىندا كونە كەلتىرىمدەردىڭ جاتقاننىن جوققا شىعارا المايمىز. م. قابانباي وسىنداي العادايلاردىڭ كوبىنەسە جەتىم بالالاردان توپتاستىرىلىپ، ارنايى تاربيەلەنەتىندىگىن جازىپتى. وسىنىڭ بارلىعى دا ءبىزدى العادايلاردىڭ قالىپتاسۋىنا مۇمكىندىك بەرگەن تاريحي، ميفتىك نەگىز- سۇيەنىشتەرىن ىزدەستىرۋگە يتەرمەلەيدى. العادايلار ۇعىمى قازاقتىڭ كونە جاۋگەرشىلىك سالت- داستۇرلەرىنەن حاباردار ەتەدى. ادەتتە، ەكى جاقتىڭ قالىڭ قولى جاپپاي ۇرىسقا كىرىسەر الدىندا جەكپە- جەككە باتىرلارىن شىعاراتىن بولعان. العاشقى جەكپە- جەككە، ەسىمى ەلگە ايگىلى باتىرلاردىڭ الدىنان ءوتىپ، باتالارىن الىپ، جاس جاۋىنگەرلەر شىققان. مىنە، سولار العادايلار دەپ اتالعان.

قاھارلى جاۋعا قامىقپاي قارسى اتتاناتىن جاس وسكىندەردىڭ امان قالۋ- قالماۋلارى ەكىتالاي ەدى. العادايدىڭ باستى مىندەتى- قارسىلاسىن جەر جاستاندىرا الماعان كۇننىڭ وزىندە، جاۋىن شارشاتۋ، السىرەتۋ. جاپون حالقىنىڭ ءوزىن - ءوزى ولىمگە قياتىن كاميكادزەلەرى كونە زامانداعى قازاقتىڭ العادايلىعىن ەسكە تۇسىرەدى. قازاق حالقىنىڭ ۇلى جىرشىسى جامبىلدىڭ ۇلىنا العاداي دەپ ات قويۋى دا «حالقىم، ەل- جۇرتىم ءۇشىن بالام ساداعا» دەگەندى اڭعارتاتىن سياقتى.

دەرەككوز: سەرىكبول قوندىباي «ارعى قازاق ميفولوگياسى»

«الاۋينفورم»