اتا-اناسىنىڭ ارقاسىندا ەلگە تانىلعان ونەرپازدار - فوتو

استانا. قازاقپارات - شوۋ-بيزنەستە حالىققا تانىلۋىنا اتا-اناسىنىڭ اتاعى ىقپال ەتكەن جۇلدىزدار از ەمەس. ولار بالالارىنىڭ ونەر الەمىنە قادام باسۋىنا العاشقىدا قارسى بولعانىمەن، كەيىننەن قولداۋ ءبىلدىرىپ جاتادى.

Baistars.kz اتا-انالارىنىڭ تانىمالدىلىعى ونەرىنە پايداسى تيگەن «جۇلدىزدى» بالالاردىڭ ءتىزىمىن ۇسىنادى.

ۇلجان ايناقۇلوۆا - اسەم ايناقۇلوۆا

قازاقستاننىڭ ەڭبەك سىڭىرگەن ءارتىسى ۇلجان ايناقۇلوۆانىڭ قىزى اسەم ايناقۇلوۆا اناسىنىڭ جولىن قۋىپ، انشىلىكتى تاڭداعان.

بۇگىندە «گۇلدەر» مەملەكەتتىك ءانسامبلىنىڭ ءانشىسى. «ەڭ ادەمى ءانىم»، «ارنايمىن ساعان»، «قازاعىم-اي»، «وكپەلەمە» اندەرى ەل اراسىندا تانىمالدىلىققا يە.

نۇرعيسا تىلەنديەۆ - دينارا تىلەنديەۆا

اتاقتى ديريجەر، قازاق حالقىنىڭ ۇلى سازگەرى نۇرعيسا تىلەنديەۆتىڭ قىزى دا اكە جولىمەن ديريجەر بولدى.

دينارا تىلەنديەۆا اكەسى 1980-جىلى قازاق فيلورمونياسى جانىنان قۇرعان «وتىرار سازى» مەملەكەتتىك اكادەميالىق فولكلورلىق-ەتنوگرافيالىق حالىق اسپاپتارى وركەسترىندە قىزمەت ەتەدى.

نۇرجامال ۇسەنبايەۆا - قارلىعاش مۇحامەدجانوۆا

اكتريسا قارلىعاش مۇحامەدجانوۆانىڭ اتا-اناسى دا قازاق ەلىنە تانىمال تۇلعالار. اكەسى- بەلگىلى كومپوزيتور ءارى سەناتور تولەگەن مۇحامەدجانوۆ بولسا، اناسى- ايگىلى قازاق وپەرا ءانشىسى نۇرجامال ۇسەنبايەۆا.

قارلىعاش 2008-جىلى العاش رەت «لاۆە» فيلمىنە تۇسكەن. سودان كەيىن «رىۆوك» جانە «يرونيا ليۋبۆي» فيلمدەرىندە شاعىن رولدەردى سومداپ شىقتى. باستى ءرولىن 2010-جىلى «سكاز و روزوۆوم زايتسە» كارتيناسىندا وينادى.

مارات وماروۆ - زارينا وماروۆا

تانىمال ءانشى مارات وماروۆتىڭ قىزى زارينا دا ونەر جولىندا جۇرگەن قازاقتىڭ اياۋلى قىزدارىنىڭ ءبىرى.

نازىك داۋىسىمەن ەلگە ۇناعان زارينانىڭ اندەرى اسىرەسە 2000-جىلدارى تانىمال بولدى. تۇرمىسقا شىققان سوڭ، وتباسىنا كوڭىل بولگەن ءانشى ساحناعا قايتا ورالدى.

مۇرات احماديەۆ - ءدىلناز احماديەۆا

قازاقستاننىڭ حالىق ءارتىسى مۇرات احماديەۆتىڭ قىزى ءدىلناز احماديەۆا اكەسىنىڭ ىزىمەن ونەر جولىن تاڭداعان بولاتىن. بۇگىندە ءدىلناز ەستراداداعى شوقتىعى بيىك جۇلدىزداردىڭ ءبىرى.

كارىم مۇتىرعانوۆ - مۇرات مۇتىرعانوۆ پەن كاريما مۇتىرعانوۆا

سيرك ارتىستەرى مۇرات پەن كاريما دا اكەسى كاريم مۇتىرعانوۆتىڭ جولىن جالعادى.

روزا رىمبايەۆا - ءالي وقاپوۆ

قازاقتىڭ پريمادونناسى، كۇمىس كومەي ءانشىسى روزا رىمبايەۆانىڭ تۇڭعىشى - ءالي وقاپوۆ. روزا قۋانىش قىزى بالاسىنا ۇنەمى قولداۋ كورسەتىپ كەلەدى.

انشىلىك كارەراسىن «سلەنگ» توبىنان باستاعان ءالي وقاپوۆ قازىر ءبىراز ساتىدان ءوتتى. ءتىپتى پروديۋسەرلىك قابىلەتىن دە بايقاپ ءجۇر.

ۇلىقپان جولداسوۆ - بولات جولداسوۆ- فاريدا جولداسوۆا

ءانشى، سازگەر ۇلىقپان جولداسوۆتىڭ قىزى - فاريدا. جولداسوۆ مىرزا ۇل-قىزىنىڭ ونەرگە كەلۋىنە ەشقاشان قارسى بولماعان. كەرىسىنشە فاريدانى بالا كەزىنەن ساحناعا الىپ شىعىپ، كورەرمەننىڭ كوزايىمى ەتكەن.

ال ۇلى بولات جولداسوۆ تا كەزىندە «مۋزارت» توبىندا گيتارا تارتىپ، ونەردەن قۇر الاقان ەمەستىگىن كورسەتكەن ەدى.

قانات پەن سۆەتا ايتبايەۆتار - ديماش قۇدايبەرگەنوۆ

كوپتەگەن حالىقارالىق بايقاۋلاردا قازاق ءانىن بيىكتەن كورسەتىپ جۇرگەن ديماش قۇدايبەرگەننىڭ اتا-اناسى ەلگە تانىمال انشىلەر قانات پەن سۆەتا ايتبايەۆتاردىڭ تۇڭعىشى.

ديماشتىڭ اتا-اناسى ونىڭ ەرەكشە داۋىس يەسى ەكەندىگىن بىلگەندىكتەن، ونىڭ ونەرگە كەلۋىنە ەش ۋاقىتتا قارسى بولماعان.

ەرمەك سەركەبايەۆ - بايعالي سەركەبايەۆ - ءجاميلا سەركەبايەۆا

بەلگىلى وپرەرا ءانشىسى ەرمەك سەركەبايەۆتىڭ بالالارى - كومپوزيتور الماس سەركەبايەۆ، «ا-ستۋديو» توبىنىڭ مۇشەسى بايعالي سەركەبايەۆ جانە جۋرناليست-جازۋشى يرينا سەركەبايەۆا.

ءجاميلا سەركەبايەۆا ولاردىڭ نەمەرە قارىنداسى بولىپ كەلەدى.

ناعيما ەسقاليەۆا - دياس ابلايەۆ

قازاقستاننىڭ ەڭبەك سىڭىرگەن ءارتىسى ناعيما ەسقاليەۆانىڭ ۇلى - دياس ابلايەۆ.



ەسقاليەۆا ۇلىنىڭ ونەر جولىنا كەلۋىنە تالاي رەت قارسى بولعانىن ايتادى. ايتسە دە، دياس ءومىرىن ونەردەن بولە الماعان.

جانار ايجانوۆا - ايجۇلدىز ايجانوۆا

حالىقتىڭ سۇيىكتى ءانشىسى جانار ايجانوۆانىڭ قىزى ايجۇلدىز دا ونەردەن كەندە ەمەس. ايجۇلدىز بۇگىندە كوپتەگەن فيلمدەرگە ءتۇسىپ جۇرگەن اكتريسا.

جاستايىنان ساحناعا شىعىپ، فلەيتانى سەرىك ەتكەن بويجەتكەن قازىر ديزاينەرلىك ونەردى قولعا الدى. ول - ت. جۇرگەنوۆ اتىنداعى ونەر اكادەمياسىنىڭ ستۋدەنتى.

ليديا كادەنوۆا - ديدار كادەن

قازاقستاننىڭ ەڭبەك سىڭىرگەن ءارتىسى ليديا كادەنوۆانىڭ ۇلى ديدار كادەن دە قازاقستاندىق شوۋ-بيزنەستەگى «جۇلدىزدى» بالالاردىڭ ءبىرى.

ديدار اناسىنىڭ كومەگىنە جۇگىنبەي، ءوز اتىن قالىپتاستىرۋعا تىرىسىپ ءجۇر. ول انشىلىگىنەن بولەك، اكتەرلىك قابلەتى دە جوعارى ەكەندىگىن بايقاتتى. ديدار «شلاگباۋم» فيلمىندە باستى رولدەردىڭ ءبىرىن سومدادى.

بايان ەسەنتايەۆا - ايساۋلە جانە ايارۋ باقىتبەك

اناسىنىڭ ارقاسىندا تانىمال بولعان تاعى ءبىر وتاندىق شوۋ-بيزنەس وكىلى دەپ ايساۋلە باقىتبەكتى ايتۋعا بولادى. ول - بەلگىلى پروديۋسەر بايان ەسەنتايەۆانىڭ قىزى.

ايساۋلە ءوزىن وسىدان بىرەر جىل بۇرىن شىققان «ماماميا» تەلەشوۋىنىڭ جۇرگىزۋشىسى رەتىندە سىنادى. سونىمەن قاتار ول اناسىنىڭ تۇسىرگەن تەلەتوپتامالارىنىڭ بىرىندە ەكىنشى قاتارداعى كەيىپكەردىڭ ءرولىن وينادى.

ەسەنتايەۆانىڭ كىشى قىزى ايارۋ باقىتبەك اسپازدىق شەبەرلىگىمەن جۇرتشىلىقتى تامساندىرىپ ءجۇر.