بيۋدجەتتىڭ ءاربىر تەڭگەسى ءتيىمدى جۇمسالۋى قاجەت - پاۆلودار وبلىسىنىڭ اكىمى
VI شاقىرىلىمداعى پاۆلودار وبلىستىق ءماسليحاتىنىڭ كەزەكتى سەسسياسىندا سويلەگەن ءوڭىر باسشىسى بولات باقاۋوۆ وسى دەرەكتەردى اتاپ ءوتتى.
سونداي- اق ول بيۋدجەتتىك باعدارلامالاردىڭ اكىمشىلەرىنە بيۋدجەت قاراجاتىن پايدالانۋ كەزىندە تيىمدىلىك پەن باسىمدىلىق پرينتسيپتەرىن ۇستانۋدى تاپسىردى.
- بيلىكتىڭ اتقارۋشى ورگاندارى مەن دەپۋتاتتىق كورپۋس جۇرگىزىلگەن جۇمىستاردىڭ ساپاسىن جانە بيۋدجەت قاراجاتىنىڭ ءتيىمدى جۇمسالۋىن قاتاڭ باقىلاۋعا الۋى ءتيىس، - دەپ اتاپ ءوتتى ايماق باسشىسى. - بيۋدجەتتىك قاراجاتتىڭ ءاربىر تەڭگەسى ناتيجە بەرۋى قاجەت. ءبىز قارجىنىڭ ماقساتسىز جۇمسالۋىن بولدىرماۋ ءۇشىن بارلىق شارانى قابىلداۋىمىز كەرەك. بۇگىنگى تاڭدا داعدارىسقا قارسى باعدارلاما بويىنشا قوماقتى قاراجات ءبولىنىپ جاتىر. «نۇرلى جول» باعدارلاماسىنىڭ جوبالارىن جۇزەگە اسىرۋ ءۇشىن بيىل 5,2 ميلليارد تەڭگە، «جۇمىسپەن قامتۋدىڭ جول كارتاسى» باعدارلاماسىنا - 4,5 ميلليارد تەڭگە، «بيزنەستىڭ جول كارتاسى-2020» باعدارلاماسىنا - 4 ميلليارد تەڭگە قاراستىرىلدى. وسىعان بايلانىستى بيۋدجەتتىك باعدارلامالاردىڭ اكىمشىلەرى تيىمدىلىك پەن باسىمدىلىق قاعيداتتارىن ۇستانۋعا مىندەتتى، ال ريەۆيزيالىق كوميسسيا بولسا، ماتەريالداردى قاراپ، ونداعى كەمشىلىكتەردى تولىقتاي جويۋعا قول جەتكىزۋى قاجەت، - دەپ تاپسىردى وبلىس اكىمى بولات باقاۋوۆ.
سونىمەن بىرگە، ايماق باسشىسى «100 ناقتى قادام» ۇلت جوسپارىنىڭ شەڭبەرىندەگى 5 ينستيتۋتسيونالدى رەفورمالاردى جۇزەگە اسىرۋعا باسا نازار اۋداردى.
- ءبىزدىڭ بىرلەسكەن قىزمەتىمىزدە ازاماتتاردى الەۋمەتتىك تۇرعىدان قامتاماسىز ەتۋ، ينفراقۇرىلىمدىق جوبالاردى جۇزەگە اسىرۋ، ايماققا ينۆەستيتسيالار تارتۋ، جاڭا ءوندىرىس وشاقتارىن اشۋ، مەملەكەتتىك- جەكە مەنشىك ارىپتەستىك مەحانيزمدەرىن جۇزەگە اسىرۋ ماسەلەلەرىنە باسىمدىق بەرىلەدى.
