قازاقستاندىق وقۋشىلار ماسساچۋسەتس تەحنولوگيالىق ينستيتۋتىندا «سارى ارقا» كۇيىن ورىندادى

استانا. قازاقپارات - نازاربايەۆ زياتكەرلىك مەكتەبىنىڭ وقۋشىلارى ماسساچۋسەتس تەحنولوگيالىق ينستيتۋتىندا «سارى ارقا» كۇيىن ورىندادى.

 «قازاقستاندىق ستۋدەنتتەر ماسساچۋسەتس تەحنولوگيالىق ينستيتۋتىندا «سارى ارقا» كۇيىن ورىندادى!»، - دەپ حابارلادى قازاقستانداعى ا ق ش ەلشىلىگى فەيسبۋكتەگى رەسمي پاراقشاسىندا.

 قازاقستاندىقتار قۇرمانعازى ساعىرباي ۇلىنىڭ تۋىندىسىن ينستيتۋتتىڭ «كيليان حولل» زالىندا ورىندادى.

قۇرمانعازى ساعىرباي ۇلى (1823-1896) - كومپوزيتور- كۇيشى، قازاقتىڭ اسپاپتى مۋزىكا ونەرىنىڭ كلاسسيگى. قۇرمانعازى قازاقستاننىڭ مۋزىكا مادەنيەتىندە ايرىقشا ورىن الادى. ەگەر ءسىز قازاق دالاسىنىڭ تىنىسى مەن جۇرەك سوعىسىن، شەكسىز ولكەدەگى الىپ- قاشپا جەل ءانىن بىلگىڭىز كەلسە، ات- تۇياعىنىڭ دۇبىرىنەن قۋانىش تاسقىنىن سەزگىڭىز كەلسە، قازاق حالقىنىڭ رۋحاني كۇشىن بيىكتىگىن، مىقتىلىعىن تانىعىڭىز كەلسە قۇرمانعازى كۇيىن تىڭداڭىز.

ونىڭ «سارى ارقا»، «بالبىراۋىن»، «سەرپەر»، «اداي» سىندى كۇيلەرى قازاقتاردا وتان، ەل دەگەن ۇعىمدارمەن استاسادى. ۇكىمەتتىڭ قۋدالاۋى جازىقسىز ايىپتاۋلار، تۇرمە - وسىنىڭ بارلىعى كۇيشى ساعىن سىندىرا المادى. اينالاسىندا بولىپ جاتقان وقيعالارعا اسا ءمان بەرە وتىرىپ، قۇرمانعازى قازاق حالقى ءومىرىنىڭ ايشىقتى سۋرەتتەمەسىن جاسادى. ونىڭ «سارى ارقا»، «الاتاۋ»، «بۇلبۇلدىڭ قۇرقۇرى» اتتى كۇيلەرى تۋعان جەر سۇلۋلىعىن كورسەتسە، «كىشكەنتاي»، «تورەمۇرات»، «اداي» كۇيلەرى باتىرلار بەينەسىن، «قايران شەشەم»، « قىزىل قايىڭ»، «كىسەن اشقان» كۇيلەرى كۇيشى ومىرىندەگى ناقتى وقيعالارعا ارنالعان.