الماتىدا تۇركيانىڭ ۇلتتىق تاۋەلسىزدىك جانە بالالار كۇنى اتاپ ءوتىلدى
«تۇركيا رەسپۋبليكاسىندا جىل سايىن 23 - ساۋىردە بالالار كۇنى اتاپ وتىلەدى. سونىمەن قاتار، بۇل كۇن - ۇلتتىق تاۋەلسىزدىك كۇنى بولىپ تابىلادى. 1920 - جىلى 23 - ساۋىردە تۇڭعىش رەت تۇركيا پارلامەنتى - تۇركيا ۇلى ۇلتتىق ءماجىلىسى (تۇۇم) قۇرىلعان بولاتىن.
وسى ءماجىلىستىڭ اشىلۋىنا ەستەلىك رەتىندە 1927 - جىلى تۇركيا رەسپۋبليكاسىنىڭ كوشباسشىسى مۇستافا كەمال اتاتۇرىك تاراپىنان 23 - ءساۋىر - بالالار كۇنى بولىپ بەلگىلەندى. بۇگىن ءبىز وسى مەرەكەنى تەك تۇرىك بالالارىمەن عانا ەمەس، سونداي- اق قازاق جانە وزگە دە ۇلت وكىلدەرىنىڭ بالالارىمەن اتاپ وتكىمىز كەلەدى. ءبىزدىڭ ەسىگىمىز بارلىق بالالار ءۇشىن اشىق! ويتكەنى، بالالار - ءبىزدىڭ بولاشاعىمىز! بۇل كۇن الەمنىڭ بارلىق بالالارى ءۇشىن دوستىقتىڭ، ىنتىماقتاستىقتىڭ باستاماسى بولسا ەكەن دەيمىن»، - دەدى «قازاقپارات» تىلشىسىنە بەرگەن سۇحباتىندا تۇركيا رەسپۋبليكاسىنىڭ الماتىداعى باس كونسۋلى رىزا قاعان يىلماز مىرزا.
بۇگىنگە مەرەكەلىك ءىس- شاراعا الماتى قالاسىنداعى ورتا مەكتەپتەردە ءبىلىم الىپ الىپ جاتقان ءار ءتۇرلى ۇلت وكىلدەرىنىڭ بالالارى، سونداي- اق، بالالار ۇيلەرىنىڭ تاربيەلەنۋشىلەرى - بارلىعى 200-دەن استام بالعىن قاتىستى.
شارا بارىسىندا بالالار تۇرىك جانە قازاق اندەرىن شىرقاپ، بي بيلەدى جانە ولەڭدەر وقىدى. ال انيماتور اكتەرلەر زالدى ارالاپ، ءوز ونەرلەرىمەن بالالار مەن ەرەسەكتەردىڭ كوڭىلىن كوتەردى.
سونىمەن قاتار، مەرەكەلىك ءىس- شارا بارىسىندا 12-16 جاس ارالىعىنداعى جاسوسپىرىمدەر اراسىندا لوتەرەيا ويناتىلدى. ونىڭ قورىتىندىسى بويىنشا باعى جانعان ءبىر ۇل جانە ءبىر قىز بالاعا اتا- انالارىمەن بىرگە تۇركيانىڭ چاناككالە قالاسىنا بارىپ كەلۋگە تۋريستىك جولداما تابىس ەتىلدى.
شارا سوڭىندا بالالار مەرەكەلىك تورتتىڭ ءدامىن تاتتى جانە ولارعا دەمەۋشىلەر تاراپىنان شاعىن سىيلىقتار ۇلەستىرىلدى.
ايتا كەتەلىك، مۇستافا كەمال اتاتۇرىكتىڭ «ۇلت بولاشاعى - بالالىق شاقتا قالانادى» دەگەن ءسوزى تۇركيادا كەڭىنەن تانىمال.
اۆتور: ايبوتا جاپپاربەرگەن
