ەلورداعا فرانسۋز راۋشانگۇلدەرى وتىرعىزىلماق - فوتو
قازىرگى كەزدە اۋدانداردا اعاشتار مەن كوشەتتەر وتىرعىزاتىن ورىندار ازىرلەنىپ، گۇلزارلاردى، كوشەلەر مەن گۇلباقتاردى تازالاۋ، توپىراق پەن قۇم شىعارۋ جۇمىستارى جۇرگىزىلۋدە. سونىمەن قاتار، قالانى سانيتارلىق تازارتۋ جانە جەرلەردى گۇل وتىرعىزۋعا دايىنداۋ جۇمىستارى قولعا الىندى.
ەلوردا اكىمدىگىنىڭ باسپا ءسوز قىزمەتىنەن حابارلاعانداي، قازىرگى كەزدە اۋدانداردا بارلىق ۋچاسكەلەردە جۇمىس ىستەۋ كەستەلەرى جاسالىپ، جاۋاپتى تۇلعالار انىقتالدى.
«سەنبىلىككە دايىندىق قىزۋ جۇرگىزىلىپ جاتىر. 2200-گە جۋىق ءىرى اعاش، سونىڭ ىشىندە، قاراعاي، شىرشا، قايىڭ وتىرعىزىلادى. بۇدان باسقا، ءۇش اۋداندا 13900 كوشەت ەگىلەدى. اتاپ ايتقاندا، تەرەك، تال، مويىل، شەگىرشىن، شەتەن جانە دولانا. بيىل ءبىر كۇندە 16 مىڭ اعاش وتىرعىزىلادى»، - دەدى «استانا - زەلەنستروي» ا ق ءتوراعاسىنىڭ ورىنباسارى بيبىگۇل بەكتەمىسوۆا.
ەلوردادا ورىنبور كوشەسىندە جانە «اراي» پاركىندە، اقىرتاس، عابدۋللين، ءۋاليحانوۆ كوشەلەرىندە، تىلەنديەۆ داڭعىلىندا جانە ت. ب. جاپپاي اعاش وتىرعىزىلادى. كوگالداندىرۋ وبەكتىلەرىندە ءتيىستى ورىندار دايىندالىپ، كوشەتتەر قويىلادى، ينەرتتىك ماتەريال (قۇنارلى جەر، توپىراق، قارا توپىراق) قاجەتتى مولشەردە اكەلىنەدى.
ايتا كەتەيىك، بيىل قالانى جيناۋ مەن كوگالداندىرۋ جۇمىستارىندا شاعىن مەحانيكالاندىرىلعان ماشينالار پايدالانىلاتىن بولادى. ونىڭ باستى باسىمدىقتارىنىڭ ءبىرى ىقشامدىلىق پەن سالماعىنىڭ جەڭىل بولۋى، بۇل كەسپە تاستار مەن جولدىڭ جيەكتەرىن بايقاپ تازالاۋعا مۇمكىندىك بەرەدى.
مۇنىمەن قوسا، بيىل ءبىر جىلدىق گۇلدەر از وتىرعىزىلادى. ولاردىڭ ورنىنا ەلوردادا كوپ جىلدىق گۇلدەر، سونىڭ ىشىندە راۋشانگۇلدەر مەن قىزعالداقتار ەگىلەدى.
