ماحابباتى ەڭ بەرىك جۇپتىڭ تاريحى

 استانا. قازاقپارات - قازاقستاندا ماحابباتى ەڭ بەرىك جۇبى رەتىندە گيننەستىڭ رەكوردتار كىتابىنا كىرگەن الماتىلىق ەرلى- زايىپتى قوزى كورپەش پەن بايان سۇلۋ كۇنىنە وراي ۇزاق ءارى باقىتتى ءومىر ءسۇرۋدىڭ قۇپياسىمەن ءبولىستى.

 95 جاستاعى سۇلتان جيەنبايەۆ پەن 94 جاستاعى نۇرانيا ءادىلشينا Tengrinews.kz تىلشىسىنە 72 جىلدان بەرى بىرگە ەكەندەرىن ايتىپ بەردى.

وتاعاسىنىڭ ايتۋىنشا، جارىمەن ول 1945 -جىلى تۇركسىبتە جۇمىس ىستەپ جۇرگەنىندە تانىسىپتى. جارى مەملەكەتتىك اربيتر بولىپ جۇمىس ىستەگەن ەكەن. تانىسقاننان كەيىن 15 كۇن وتكەندە ول سۇيىكتىسىنە ۇسىنىس جاساپتى، سەبەبى ول وقۋعا كەتۋى كەرەك بولعان. جاس جۇپتىڭ ۇيلەنۋ تويى قاراپايىم، اسىپ- تاسۋسىز وتكەن. « ءبىز ۇيلەندىك، سوسىن مەن ەكىنشى كۇنى ماسكەۋگە كەتىپ قالدىم. ەشكىممەن كەڭەسپەدىم، ەشكىمگە ايتپادىم، وعان "ۇيلەنەيىك" دەدىم، ول كەلىسىم بەردى. سويتتىك تە احاج- عا بارىپ، تىركەلدىك. سوسىن توي وتكىزدىك، ول ۋاقىتتا سوعىستان كەيىنگى جىلدار قيىن ەدى، ازىق- تۇلىك الۋ قيىن بولدى. 20 ادامعا داستارحان جايدىق»، - دەپ ەسكە الدى سۇلتان جيەنبايەۆ.

«تاياۋدا، ۇيلەنگەنىمىزگە 70  جىل تولعاندا مەن بالالارىم مەن نەمەرەلەرىمدى جينادىم. اشىعىن ايتقاندا، ءبىز ۇيلەنگەندە جارىما نەكە ساقيناسىن بەرمەگەن ەدىم. مۇنداي دۇنيەلەردى تۇسىنبەيتىنمىن. ءسويتىپ 70  جىل وتكەندە قاتەمدى تۇزەپ، جارىما نەكە جۇزىگىن سىيلادىم»، - دەدى ول.

سۇلتان جيەنبايەۆ وسى جىلدار بويى قاتارداعى ينسپەكتوردان قازاق ك س ر- نىڭ مينيسترلەر كەڭەسىنىڭ ءتوراعاسى قىزمەتىنە دەيىن كوتەرىلگەن. ول ايانباي ەڭبەك ەتىپ، نۇرانيانىڭ قورعانى بولا ءبىلدى. نۇرانيا ءۇي شارۋاشىلىعىمەن اينالىسىپ، بالالارىن باعادى. «جاس كەزىمىزدە ۇرىسۋعا ۋاقىت بولمادى، جۇمىس ىستەدىك. ءبىر پاتەردە جەتى ادام تۇردىق - ءبىز، اتا- انامىز جانە قارىنداستارىمىز. ءبىر بولمەگە سىيدىق. سولاي ءومىر سۇردىك، وتباسىمىز تاتۋ- ءتاتتى عۇمىر كەشتى»، - دەيدى نۇرانيا ءادىلشينا.

«پاتەردىڭ جاعدايى بولماعاندىقتان، وتىن جارىپ، تاڭنان پەش جاعىپ، جارىم بارلىعىنا دا ۇلگەردى، مەن بولسام جۇمىستا بولامىن»، - دەپ ەسكە الادى سۇلتان اتا.

«ارينە، قيىندىقتار بولدى، ءبىراق ءبىزدىڭ قانشا جىل بىرگە ەكەنىمىزدى بىلەسىز بە؟ ول ماعان ءارقاشان قۇرمەتپەن قاراپ، تۋىستارىما كوڭىل ءبولدى، ناعىز دوسىم بولا ءبىلدى. ءارقاشان جاعدايىمدى جاساپ، ءدامدى تاعام ءپىسىردى. بۇل دا ماڭىزدى، بىلە بىلسەڭىز ايەلىڭ ساعان جاقسى قاراپ، ادال ءارى تۋىستارىڭا قۇرمەت كورسەتسە، بۇل وتە ماڭىزدى. وسى جاعداي ءبىزدى بەرىك ەتە ءتۇستى"، - دەيدى سۇلتان اتا.

سونىمەن قاتار ولار قازىرگى جاستاردىڭ اجىراسىپ جاتقانىن ايتىپ، نالىدى. "قازىرگى جاستار ۇرىسىپ قالسا، بىردەن اجىراسۋعا اسىعادى. بىزدە ونداي بولماعان. ۇرىسىپ قالساق تا، ونداي ادەتىمىز جوق بولدى. سويلەسپەي قويۋ، وكپەلەۋ دەگەن ەشقاشان بولعان ەمەس. مەن ءبارىن ۇمىتامىن. ءبىز ەشقاشان اجىراسۋ تۋرالى سويلەسكەن ەمەسپىز. ءبىر- ءبىرىمىزدىڭ پىكىرىمىزدى ءارقاشان تىڭداي بىلەمىز"، - دەدى نۇرانيا ءادىلشينا.

 ولار ءۇش بالاسىن ءوسىرىپ، جەتى نەمەرەسىن جانە 13 شوبەرەسىن باعىپ وتىر. عاشىقتار كۇنىن ەڭ بەرىك ءارى باقىتتى جۇپ ءوز وتباسىلىق داستارحانىندا اتاپ وتەدى.