پاۆلوداردا كوزى ءتىرى سانتەحنيككە ەسكەرتكىش قويىلدى

استانا. قازاقپارات - ءبىر قىزىعى - ءمۇسىننىڭ پروتوتيپىنىڭ كوزى ءتىرى.

ول 40 جىل بويى وسى سالادا تىنىمسىز ەڭبەك ەتكەن سەرگەي تىچكوۆ، - دەپ حابارلايدى ك ت ك ارناسىنىڭ سايتى.

شويىننان قۇيىلعان تۋىندىنى كەيىپكەردىڭ ءوزى العاشقىلاردىڭ ءبىرى بولىپ كوردى. وعان قاجەت قاراجاتتى وزەن ۆوكزالىنىڭ ۇجىمى جيناعان. ءوزىنىڭ كوشىرمەسىن كورگەن سانتەحنيكتىڭ(سانتەحنيك - سۋ قۇبىرلارىن جوندەۋشى - رەد.) كوڭىلى بوساپ، بۇعان دەيىن ەش سىي-قۇرمەتكە بولەنبەگەنىن ايتتى.

ال تۋىندىنى جاساۋ ءۇشىن كەرەكۋلىك مۇسىنشىلەر بىرنەشە اي تەر توككەن. وزەن ۆوكزالىنىڭ باسشىلىعى بولسا بيىل مۇندا كۇزەتتى كۇشەيتىپ، باقىلاۋ كامەرالارىنىڭ سانىن كوبەيتكەن. ويتكەنى بۇعان دەيىن وسى اۋماقتا تۇرعان سۋ پەرىسى ءمۇسىنىن بۇزاقىلار سىندىرىپ، وزەنگە لاقتىرىپ تاستاعان بولاتىن.

«جالپى سانتەحنيكتەردى ەشكىم تانىپ بىلە بەرمەيدى. سوندىقتان بۇل جالعىز ماعان عانا ەمەس، وسى سالادا جۇمىس ىستەپ جۇرگەن ازاماتتار ءۇشىن دە سىي بولماق»، - دەدى سانتەحنيك سەرگەي تىچكوۆ.

سۋرەت pavlodarnews.kz-سايتىنان الىندى 

 Stan.kz