لەوناردو دا ۆينچيدىڭ ۇرپاقتارى تابىلدى

استانا. قازاقپارات - لەوناردو دا ۆينچي - يتاليالىق ۇلى سۋرەتشى ءارى عالىم. ونىڭ تەگى ءبىز ويلاعانداي «دا ۆينچي» دەپ بەرىلمەگەن.

ناقتىراق ايتقاندا ونىڭ تەگى بولماعان. سول سەبەپتى ونى «ۆينچي قالاشىعىنان شىققان» دەگەن ماعىنامەن «دا ۆينچي» دەپ اتاعان. ءبىراق بۇل جازبا ونىڭ تەگى تۋرالى ەمەس، ۇرپاعى تۋرالى بولماق.

بۇعان دەيىن سۋرەتشىنىڭ بالاسى بولماعان دەپ ەسەپتەلىپ كەلگەن. ونەر تانۋشى، لەوناردو مۇراجايىنىڭ ديرەكتورى الەسساندرو ۆەسسوزي بۇل جاڭالىقتى 14 -ساۋىردە سۋرەتشىگە ارنالعان كونفەرەنسيادا جاريا ەتكەن. زەرتتەۋشى «عالىمنىڭ ۇرپاعى قالماعان» دەگەن دەرەككە سەنبەي، 43 جىل بويى وسى جۇمباقتىڭ جاۋابىن ىزدەپ كەلگەن. ناتيجەسى: ايگىلى سۋرەتشىنىڭ بۇكىل الەم بويىنشا 35 ۇرپاعى بار. يتاليالىق عالىمدار وسىنداي قورىتىندىعا كەلدى.

ماماندار ىزدەستىرۋ جۇمىستارىن 40 جىلدان استام ۋاقىت بويى جۇرگىزىپتى. بەلگىلى بولعانداي، «دجوكوندا» اۆتورىنىڭ تۋىستارى نەگىزىنەن يتاليادا تۇرادى ەكەن. ولاردىڭ اراسىندا اتاقتى رەجيسسەر فرانكو دزەففيرەللي دە بار. سونىمەن قاتار، شەبەردىڭ ۇرپاقتارى فرانسيا مەن يسپانيادان دا تابىلعان. ۇرپاقتارىنىڭ ءبىرى رەجيسسەر، ءبىرى كونديتەر، ءبىرى پوليسيا قىزمەتكەرى ەكەن، دەپ جازادى massaget.kz.