قىرعىزستاندا جول جيەگىنە كولىك قالدىرعان جۇرگىزۋشى جاۋاپقا تارتىلادى

استانا. قازاقپارات - قىرعىزستاندا ەندى كولىكپەن بەلگىلەنبەگەن جەرگە توقتاساڭىز، زاڭ الدىندا جاۋاپ بەرەسىز. اكىمشىلىك كودەكسكە وسىنداي جاڭا باپ قوسىلدى.

ياعني كولىگىن جول جيەگىنە تاستاپ كەتكەن ازاماتتار تەمىر تۇلپارىن ايىپ تۇراعىنان ىزدەيتىن بولادى. قازىرگى تاڭدا تەك بىشكەكتىڭ وزىندە 400 مىڭعا جۋىق كولىك بار. ولاردىڭ كوبى بەلگىلەنبەگەن جەرگە توقتاۋدى ماشىققا اينالدىرعان. ەندى ونداي ەركىندىككە جول جوق. ەل ۇكىمەتى الداعى ءۇش اي كولەمىندە زاڭنامانى بەكىتىپ، كۇشىنە ەنگىزبەك.

«جول بەلگىلەرىنىڭ استىندا ەۆاكۋاتور جۇمىس ىستەيتىندىگى تۋرالى اقپارات ىلىنەدى. ەگەر زاڭعا قۇلاق اسپاسا، كولىگىن ايىپ تۇراعىنا الىپ كەتەدى»، - دەيدى قىرعىزستان پاترۋلدىك ميليتسيا ءبولىمىنىڭ باسشىسى نۇر ساتىبالديەۆ.

 جاڭا زاڭ رەسپۋبليكانىڭ بارلىق ايماعىنا قاتىستى بولماق. ءماجبۇرلى ەۆاكۋاتسيا كەزىندە كولىكتىڭ يەسى بولۋى شارت ەمەس، دەپ جازادى 24.kz. ال زاڭگەر ماماندار پروتوكول تولتىرۋ تارتىبىنە ەرەكشە ءمان بەرۋ كەرەك دەيدى. «تىيىم سالىنعان جەرلەرگە توسقاۋىل قويۋ كەرەك. سوڭعى كەزدە ءتىپتى جاياۋ جۇرگىنشىلەر مەن باعدارشامنىڭ ماڭىنا كولىگىن قويىپ كەتەتىندى شىعارعان. ول ءوز كەزەگىندە كوپتەگەن كەدەرگىلەر كەلتىرەدى»، - دەيدى زاڭگەر قايرات وسموناليەۆ.

الداعى ءۇش ايدىڭ كولەمىندە جەكە ەۆاكۋاتسيالىق كومپانيالارمەن كەلىسىمشارت جاساسۋ جۇرگىزىلەدى. بۇعان دەيىن جەرگىلىكتى ميليتسيانىڭ كولىكتى ەۆاكۋاتورمەن الىپ كەتۋگە قۇقى بولماعان. «ەندى جولداعى ءتارتىپ تە ءبىر قالىپقا تۇسەدى»، - دەيدى ماماندار.