تيمۋر قۇلىبايەۆ حالىقارالىق وليمپيادا كوميتەتىنىڭ توراعاسىمەن كەزدەستى

استانا. قازاقپارات - شۆەيتساريانىڭ لوزاننا قالاسىنا قازاقستان ۇلتتىق وليمپيادا كوميتەتى باسشىلارى رەسمي ساپارمەن بارىپ، دەلەگاتسيا حالىقارالىق وليمپيادالىق كوميتەتىنىڭ شتاب-پاتەرىندە بولدى.

كەزدەسۋ بارىسىندا ۇيىم باسشىلارى الەمدىك وليمپيادا قوزعالىسىن دامىتۋ، بۇنداعى قۇندىلىقتاردى ىلگەرىلەتۋدەگى ورتالىق ازيا ءوڭىرىنىڭ ءرولىن، سپورت سالاسىنداعى جاھاندىق ىنتىماقتاستىق ماسەلەلەرىن تالقىلادى.

سونىمەن قاتار، «وليمپيادالىق كۇن ءتارتىبى-2020» بويىنشا ۇسىنىمداردى جۇزەگە اسىرۋ تۋرالى ءسوز بولدى. بۇل تۋرالى ۇلتتىق وليمپيادالىق كوميتەتتىڭ باسپا ءسوز قىزمەتىنەن حابارلاندى.

«سپورت - بۇل بۇگىنگى تاڭدا قوعامنىڭ الەۋمەتتىك- مادەني دامۋىنا سەپتىگىن تيگىزەتىن اسا ءتيىمدى قۇرال. ءبىز جالپىلاما العاندا سپورتتىڭ الەمدەگى بەيبىتشىلىكتى ساقتاۋداعى، تولەرانتتىلىق پەن ءوزارا سىيلاستىقتى ىلگەرىلەتۋ ارقىلى قوعامدى دامىتۋداعى ءرولىن جوعارى باعالايمىز. سپورت گەندەرلىك تەڭدىكتى ساقتاۋدا دا، جاس ۇرپاقتى ءبىلىم مەن مادەنيەتكە تاربيەلەۋدە دە، الەۋمەتتىك ينتەگراتسيادا دا ەرەكشە ءرول اتقارادى»، - دەدى قازاقستان ۇلتتىق وليمپيادا كوميتەتىنىڭ ءتوراعاسى تيمۋر قۇلىبايەۆ.

ءوز كەزەگىندە ح و ك باسشىسى توماس باح قازاقستاندىق كوميتتەتتىڭ ۇلتتىق فەدەراتسيانىڭ ءرولىن كۇشەيتۋ تۋرالى جوسپارىنا قولداۋ ءبىلدىرى ءوتتى. ونىڭ پىكىرىنشە، فەدەراتسيا سپورتتى دامىتۋدا نەگىزگى قوزعالتقىش كۇش بولىپ تابىلادى. «قازاقستاننىڭ ۇلتتىق وليمپيادا كوميتەتى بار-جوعى التى اي ىشىندە حالىقارالىق كوميتەتپەن تىعىز ىنتىماقتاستىق بايلانىس ورناتىپ، ۇيىمنىڭ جاڭا جارعىسىن بەكىتۋ بويىنشا اۋقىمدى جۇمىستار اتقاردى. بۇل ۇلكەن جەتىستىك جانە سپورت يندۋسترياسىنىڭ كەلەشەك ءتيىمدى جۇمىسى ءۇشىن جۇيەلى نەگىز قالىپتاستىرادى»، - دەدى توماس باح.

سونىمەن قاتار، توماس باح تيمۋرا قۇلىبايەۆتى جاقىندا عانا ازيا وليمپيادالىق كەڭەسىنىڭ ۆيتسە-پرەزيدەنتى بولىپ تاعايىندالۋىمەن قۇتتىقتاپ، وليمپيادالىق قوزعالىس پەن تۇتاستاي سپورتتى دامىتۋداعى سىندارلى ىنتىماقتاستىققا سەنىم ءبىلدىردى.

بۇدان بولەك، رەسمي ساپار اياسىندا ح و ك ءار ءتۇرلى دەپارتامەنتتەرى قازاقستاندىق ارىپتەستەرىمەن جۇمىس كەزدەسۋلەرىن وتكىزدى. ونىڭ بارىسىندا تاراپتار قازاقستاننىڭ حالىقارالىق وليمپيادا كوميتەتىنىڭ باعدارلامالارىنا قاتىسۋى، دامۋ ماسەلەلەرى بويىنشا ۇيىمداردىڭ ءوزارا ارەكەتتەستىگى، ح و ك ماركەتينگتىك ارنالارى، سونىڭ ىشىندە وليمپيادالىق تەلەارنا پلاتفورماسىن پايدالانۋ ارقىلى ىنتىماقتاستىقتى دامىتۋ ماسەلەلەرى قوزعالدى.

اۆتور: قانات مامەتقازى ۇلى