قازاقستاندا الەمدەگى ەڭ ارزان كولىك ساتىلىمعا شىعادى
الەمدىك كولىك نارىعىنىڭ ساراپشىلارى ۇندىلىك Bajaj كومپانياسى وندىرگەن شاعىن Qute كولىگىنىڭ قۇنى استانادا 5000 دوللار بولادى دەپ بولجاپ وتىر.
ءوزىنىڭ كەرەمەت قولجەتىمدى بولۋىمەن اتى شىققان بۇل كولىكتى باستاپقىدا تەك استانادان ساتىپ الۋ مۇمكىن بولادى. ەگەر سۇرانىس جوعارىلاسا، وندا كولىكتەر وسكەمەن، شىمكەنت، قوستاناي جانە اقتوبە قالالارىندا دا ساتىلىمعا شىعارىلادى.
ال ءۇندىستاننىڭ وزىندە Qute كولىگى بار- جوعى 2000 دوللار تۇرادى ەكەن. دەگەنمەن، كولىك ماماندارى بۇل ماركانىڭ ەلىمىزدە سىڭىسە قويۋىنا كۇمانمەن قارايدى. ولاردىڭ ويىنشا، اتالمىش كولىك ەلىمىزدىڭ تەحنيكالىق تالاپتارىنا ساي كەلمەيدى.
Euro NCAP تەستىنىڭ ناتيجەسى بويىنشا بۇل مودەل «ءولىم كاپسۋلاسى» دەگەن اتقا يە بولعان. سەبەبى، كولىكپەن ساعاتىنا 70 شاقىرىم جىلدامدىقتا اپاتقا تۇسسە، جۇرگىزۋشىنىڭ امان قالۋى ەكىتالاي.
كولىكتىڭ ارزاندىعىنان بولەك، تاعى ءبىر ءتيىمدى تۇسى - از بەنزين قاجەت ەتەتىندىگى (100 شاقىرىم جەرگە 2,8 ليتر بەنزين).
