رەسەي «قىرىم تاتارلارى ءماجىلىسىن» ەكسترەميستىك ۇيىم رەتىندە تانىدى

استانا. قازاقپارات - قىرىمنىڭ باس پروكۋرورى ناتاليا پوكلونسكايا رەسەي اننەكتسيالاپ العان قىرىمداعى جەرگىلىكتى تاتارلار ءماجىلىسىنىڭ قىزمەتىن توقتاتۋ تۋرالى بۇيرىق بەردى.

بۇل تۋرالى ت ا س س اگەنتتىگى حابارلايدى.

بۇيرىق ەنگىزىلگەن قۇجاتتىڭ ءبىر كوشىرمەسى قىرىم تاتارلارى كەڭەسىنىڭ باسشىسىنا تاپسىرىلعان. وندا: «ر ف زاڭنامالارىنا سايكەس جانە ماعان جۇكتەلگەن وكىلەتتىلىكتەرگە سۇيەنە وتىرىپ، رەسەي فەدەراتسياسى زاڭنامالارىندا كورسەتىلگەن ەرەجەلەردىڭ بۇزىلۋىنىڭ الدىن الۋ ماقساتىندا «قىرىم تاتارلارى ءماجىلىسى» بىرلەستىگىنىڭ قىزمەتىن توقتاتۋدى بۇيىرامىن»، - دەيدى پوكلونسكايا.

قىرىمنىڭ باس پروكۋرورى ناتاليا پوكلونسكايا ر ف فەدەرالدى زاڭىنىڭ 9-10- باپتارىن نەگىزگە العان. بۇل باپتار بويىنشا «ەكسترەميستىك ۇيىمداردىڭ قىزمەتىنە شەكتەۋ قويۋ جانە الدىن الۋ» شارالارى قولدانىلادى.

ءتىپتى پوكلونسكايا «قىرىم تاتارلارى ءماجىلىسىن» رەسەي تەرريتورياسىندا تىيىم سالىنعان ءدىني جانە قوعامدىق ۇيىم ساناتىنا قوسۋدى تالاپ ەتىپ، رەسەيدىڭ ادىلەت مينيسترلىگىنە حات جولداعان.

قىرىمنىڭ جوعارعى سوتىنىڭ قاۋلىسى بويىنشا، «قىرىم تاتارلارى ءماجىلىسىنىڭ» قىزمەتىن توقتاتۋ شارالارىنا مىنالار كىرگەن:

- مەملەكەتتىك جانە مۋنيتسيپالدىق ب ا ق- تى پايدالانۋعا؛

- قوعامدىق ءىس-شارالار (مەيلى ول مادەني شارالار بولسا دا) وتكىزۋگە؛

- بانكتىك ەسەپ-شوتتار اشۋعا؛

- قانداي دا ءبىر ۇيىمداسقان ءىس-شارالار وتكىزۋگە، - رەسەيدىڭ فەدەرالدى زاڭنامالارى بويىنشا تىيىم سالىنعان.

ال قىرىم تاتارلارىنىڭ ءماجىلىسى پوكلونسكايانىڭ ۇكىمىنە قارسى شاعىم تۇسىرمەكشى. بۇل تۋرالى اتالعان ۇيىم وكىلى، قۇقىق قورعاۋشى جەميل تەلىمشيەۆ مالىمدەدى.