قازاقستاندا مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ ەنگىزىلۋى مۇمكىن
ۆيتسە-مينيستر ەرجان ءبىرتانوۆ قاتەلىگى ءۇشىن باس بوستاندىعىنان ايىرىلعان ەكى دارىگەرگە قاتىستى ماسەلەگە وراي وسىنداي پىكىر بىلدىرەدى.
«قازا بولعان ايەلدەردىڭ تۋىستارىنا شىن نيەتىممەن كوڭىل ايتامىن. ال دارىگەرلەرگە تاعايىندالعان جازا تىم قاتال دەپ سانايمىن. دەگەنمەن، بۇل سوت شەشىمى. زاڭدا بەلگىلەنگەن تارتىپپەن اپپەلياتسياعا بەرۋ قاجەت»، - دەپ جازدى ول Facebook پاراقشاسىندا.
بۇدان بولەك، ۆيتسە-مينيستر پروبلەمانى جان-جاقتى تالداۋعا ۋادە بەرىپ، «اسىرەسە پاتسيەنتتەر ولىمىنە نەمەسە ولاردىڭ دەنساۋلىعىنا زالال تيگىزەتىن وقيعالارعا بايلانىستى مەديتسينا قىزمەتكەرلەرى ارەكەتىن باعالاۋداعى ادىلدىك پەن وبەكتيۆتىلىككە قول جەتكىزۋگە باعىتتالعان» زاڭناماعا ءتيىستى وزگەرىستەر ەنگىزۋگە كىرىسەتىنىن ايتادى.
«دارىگەرلەر مەن مەدبيكەلەر ارەكەتتەرىنىڭ كاسىبي قۇزىرەتى مەن قۇقىقتىلىعىن باعالاۋدا مەدقىزمەتكەرلەر قاۋىمداستىعىنىڭ ءرولىن ارتتىراتىن بولامىز. مەدقىزمەتكەرلەردىڭ كاسىبي جاۋاپكەرشىلىگىنە ساقتاندىرۋدى ەنگىزۋگە نيەتتىمىز»، - دەپ اتاپ ءوتتى ول.
ەسكە سالا كەتەيىك، بۇعان دەيىن حابارلاعانىمىزداي 11- ساۋىردە استانا قالاسىندا 2№ پەريناتالدى ورتالىقتا بوسانۋ بارىسىندا اجال قۇشقان ايەلدىڭ ولىمىنە بايلانىستى دارىگەرلەرگە سوت ۇكىمى شىققان بولاتىن.
اۆتور: قانات مامەتقازى ۇلى
