تارازدا ب. مومىش ۇلىنىڭ شىعارماشىلىعىنا ارنالعان كىتاپ كورمەسى ءوتتى

استانا. قازاقپارات - تاراز مەملەكەتتىك پەداگوگيكالىق ينستيتۋتىندا داڭقتى قولباسشى، حالىق قاھارمانى، كورنەكتى جازۋشى باۋىرجان مومىش ۇلىنىڭ شىعارماشىلىعىنا ارنالعان كىتاپ كورمەسى ءوتتى، دەپ حابارلايدى تارمپي اقپاراتتىق-يميدجدىك قىزمەتىنەن.

«ۇلت كەلەشەگىن كوكسەگەن كەمەڭگەر تۇلعا» اتتى تاقىرىپتاعى ءىس-شارا بۇكىل الەمدىك كىتاپ جانە اۆتورلىق قۇقىق كۇنىنە وراي ۇيىمداستىرىلدى. ماقساتى - جاستاردىڭ شىعارماشىلىق جانە الەۋمەتتىك بەلسەندىلىگىن ارتتىرۋ، ۇلتتىڭ زياتكەرلىك جانە رۋحاني دەڭگەيىن كوتەرۋگە ۇلەس قوسۋ.

كورمەگە ۇلت ماقتانىشى تۋرالى قازاق، ورىس تىلدەرىندە جارىق كورگەن 100 گە جۋىق ادەبيەت كوپشىلىك نازارىنا ۇسىنىلدى. اتاپ ايتقاندا، باۋىرجان مومىش ۇلىنىڭ كوپتومدىق شىعارمالار جيناعىنىڭ 30 تومى، «فوتو قۇجاتتىق البومى»، تارمپي رەكتورى داريا قوجامجاروۆانىڭ «باۋىرجان تانۋعا كىرىسپە» كىتابى، باتىردىڭ كەلىنى زەينەپ احمەتوۆانىڭ «بابالار اماناتى» جانە ءار جىلدارى شىققان تۋىندىلار بار. سونىمەن قاتار 2010-جىلى تاراز مەملەكەتتىك پەداگوگيكالىق ينستيتۋتىندا وتكەن «ب. مومىش ۇلىنىڭ ءومىرى مەن ونەگەسى» اتتى حالىقارالىق عىلىمي-تاجىريبەلىك كونفەرەنسياسىنىڭ ماتەريالدار جيناعى دا كورمەگە قويىلدى.

جيىنعا قاتىسۋشىلار رەجيسسەر ءماجيت بەگاليننىڭ «ەل باسىنا كۇن تۋسا» فيلمىن تاماشالادى.

اۆتور: مارلان جيەمباي