كەلەسى جىلدان باستاپ قازاقستاندىقتار جەكەمەنشىك اۋرۋحانالاردا تەگىن ەمدەلە الادى - ە. ءبىرتانوۆ

استانا. قازاقپارات - مەملەكەتتىك مەديتسينالىق ساقتاندىرۋ قورى جۇمىسىن باستاعان سوڭ، قازاقستاندىقتار وسى قورمەن كەلىسىمشارتقا وتىرعان جەكەمەنشىك ەمحانالاردا تەگىن ەمدەلە الادى.

 بۇل تۋرالى بۇگىن «اتامەكەن» ۇلتتىق كاسىپكەرلىك پالاتاسىندا دەنساۋلىق ساقتاۋ سالاسىنداعى مەملەكەتتىك- جەكەمەنشىك ارىپتەستىكتى دامىتۋ جونىندەگى وتىرىسقا قاتىسا وتىرىپ، دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى ەرجان ءبىرتانوۆ ءمالىم ەتتى.

 «جىلدىڭ باسىندا ەلباسى ن. نازاربايەۆ دەنساۋلىق ساقتاۋ سالاسىن دامىتۋ جونىندەگى مەملەكەتتىك باعدارلامانى بەكىتتى. دەنساۋلىق ساقتاۋدى دامىتۋ باعدارلاماسىندا العاش رەت مەملەكەتتىك- جەكەمەنشىك قارىم- قاتىناس ماسەلەلەرى كورىنىس تاپتى. وسى باعدارلاما بويىنشا دەنساۋلىق ساقتاۋ مينيسترلىگى جەرىلىكتى اكىمدىكتەرمەن جۇمىس ىستەپ جاتىر. ناقتىراق ايتسام، ءار وبلىستا «قاي مەكەمە جەكەمەنشىك سەكتوردىڭ مەڭگەرۋىنە وتسە، ءتيىمدى بولادى» دەگەن ماسەلەنى تالقىلاپ جاتىرمىز. ەكىنشىدەن، وسى مەملەكەتتىك- جەكەمەنشىك ارىپتەستىك اياسىندا جاڭادان نىساندار سالىنۋى كەرەك. قاي نىساندار جەكەمەنشىك ينۆەستيتسياعا سالىناتىنىن انىقتايمىز»، - دەدى ۆيتسە- مينيستر.

ۆيتسە- مينيستر ءتۇسىندىرىپ وتكەندەي، مەملەكەتتىك- جەكەمەنشىك سەكتور اياسىندا جاڭادان سالىناتىن دەنساۋلىق ساقتاۋ نىساندارىنىڭ ينۆەستيتسياسى 5-7 جىلدان باستاپ 20 جىل ىشىندە تۇگەل قايتارىلادى. ال، قازىر جۇمىس ىستەپ تۇرعان دەنساۋلىق ساقتاۋ نىساندارىن مەملەكەتتىك- جەكەمەنشىك ارىپتەستىككە قالاي تارتامىز دەگەن ماسەلەگە توقتالعان ول:

«ەكىنشى ءبىر جاڭالىق - قازىر جۇمىس ىستەپ تۇرعان ءارتۇرلى دەنساۋلىق ساقتاۋ مەكەمەلەرىن مەملەكەت تاراپىنان جەكەمەنشىك سەكتورعا تاپسىرۋ ماسەلەسى. بۇل جاعدايدا ءبىز ينۆەستيتسيالىق تاريف ەنگىزبەيبىز. كەلەسى جىلدان باستاپ مەملەكەتتىك مەديتسينالىق ساقتاندىرۋ قورى جۇمىسىن باستايدى. سول كەزدە حالىق جەكەمەنشىك مەديتسينالىق ۇيىمداردا تەگىن ەمدەلە الادى. تەك ول مەديتسينالىق ۇيىم وسى ساقتاندىرۋ قورىمەن كەلىسىمشارت جاساسۋى كەرەك. قازىر جەكەمەنشىك ەمدەۋ ورنىنا بارۋ ءۇشىن حالىق ءوز قالتاسىنان اقشا شىعارادى. ال، قور جۇمىسىن باستاعان سوڭ، ياعني، كەلەسى جىلدان ناۋقاس قالتاسىنان اقشا تولەمەيدى. جەكەمەنشىك ەمحانا ناۋقاستىڭ ەم العان باعاسىن ساقتاندىرۋ قورىنا جىبەرەدى، وسىلايشا، ونىڭ كەتكەن شىعىنىن قور تولەيدى. تەك بارىپ ەم العان مەكەمە قورمەن كەلىسىمشارت جاساۋى كەرەك»، - دەپ ءتۇسىندىردى.

ۆيتسە- مينيستر اتاپ وتكەندەي، سپيد ورتالىقتارى، تۋبەركۋلەز ديسپانسەرلەرى مەن پسيحيكالىق اۋىتقۋى بار ناۋقاستاردى ەمدەيتىن ورىندار جەكەمەنشىككە وتپەيدى.

اۆتور: كەنجەكەي توقتامۇرات قىزى