ءىرى قالالاردا ءۇي ساتۋ قيىنداپ بارادى
جىلجىمايتىن مۇلىك اگەنتتىگىنىڭ حابارلاۋىنشا، ناۋرىزدا جاسالعان جىلجىمايتىن مۇلىك ساۋدا كەلىسىم- شارتتارى باسەڭدەگەن. وعان سەبەپ بولعان سايلاۋدان كەيىن كۋرستىڭ قايتا كوتەرىلەتىنى جايلى قاۋەسەت. قالاي بولعاندا دا ناۋرىزدا باعانىڭ تومەندەۋى بايقالدى. Kn.kz ساراپتاما قىزمەتىنىڭ مالىمەتىنشە، استانا، الماتى مەن قاراعاندىدا ءۇي باعاسى سايكەسىنشە 4,8 جانە 6 پايىزعا ارزاندادى.
استاناداعى Premium جىلجىمايتىن مۇلىك ساتۋ اگەنتتىگىنىڭ قىزمەتكەرى شىنار سازانبايەۆانىڭ ايتۋىنشا، حالىق اقشالارىن تەڭگەمەن ساقتاۋعا جۇرەكسىنىپ، جاپپاي جىلجىمايتىن مۇلىك ساتىپ الۋعا كوشتى. ءۇي باعاسىنىڭ ارزانداۋىنا وسى سەبەپ بولۋى مۇمكىن. سونىمەن قاتار، باعانى تەك تەڭگەمەن بەلگىلەۋ تۋرالى زاڭنىڭ دا نارىققا اسەر ەتكەنى بەلگىلى.
ال الماتىداعى RIA Light جىلجىمايتىن مۇلىك اگەنتتىگى قىزمەتكەرى يانا سيمونوۆا قازىر جىلجىمايتىن مۇلىك ساتىپ الۋعا نيەتتىلەردىڭ كوپ ەكەنىن ايتادى. الايدا ۇسىناتىن باعالارى تومەن. «مەنىڭ ويىمشا، نارىق قازىر قىزىپ تۇر. جاڭا ۇيلەر دە، ەسكى ۇيلەر دە سۇرانىستا. اقپاندا ساۋدا جاقسى ءجۇردى. ناۋرىزدا ساۋدا كەلىسىم- شارتتارى باسەڭدەدى»، - دەيدى يانا سيمونوۆا.
Estate اگەنتتىگىنىڭ وكىلى دميتري ليدىڭ پىكىرى باسقاشا. ونىڭ ايتۋىنشا، ناۋرىزدا ساۋدا جاقسى جۇرگەن. ويتكەنى اقپاندا حالىق دەۆالۆاتسيادان قورىقتى. باعاعا كەلەر بولساق، ءۇي ارزانداۋدا. ساتۋشىلار دا تومەن باعالار سۇراپ وتىر.
قاراعاندىعا كەلەر بولساق، جاعداي ءبىرقالىپتى. «پروسپەكت» رەلتورلىق اگەنتتىگى مالىمەتىنشە، حالىقتىڭ تولەم قابىلەتىنىڭ تومەندەۋى، نەسيەلىك ساياساتتىڭ كۇشەيتىلۋى مەن قۇرىلىس سەكتورىن قارجىلاندىرۋدىڭ تومەندەۋىنە قاراماستان جىلجىمايتىن مۇلىك باعاسىندا ايتارلىقتاي وزگەرىس جوق.
ساراپشىلاردىڭ ايتۋىنشا، الماتى، استانا مەن قاراعاندىدا داعدارىسقا قاراماستان ساۋدا كەلىسىمشارتتارى كوپ. ستاتيستيكاعا سۇيەنسەك، 2016 -جىلدىڭ اقپانىندا قاراعاندى وبلىسىندا ساۋدا كولەمى 36 پايىزعا، استانادا 54, الماتىدا 34 پايىزعا ۇلعايعان.
مامانداردىڭ ايتۋىنشا، يپوتەكالىق نەسيەلەندىرۋدىڭ ازايۋى سۇرانىستى ازايتىپ، بۇل ءوز كەزەگىندە باعانىڭ تومەندەۋىنە اكەپ سوعۋى مۇمكىن. سونىمەن قاتار حالىقتىڭ تولەم قابىلەتىنىڭ تومەندەۋى دە نارىققا اسەر ەتپەك.
دەگەنمەن، سۇرانىستىڭ تومەندەۋى مەن باعانىڭ ارزانداۋى نارىقتاعى ۇسىنىستى دا ازايتتى. اتالعان قالالاردا 2015 -جىلدىڭ ناۋرىزى مەن 2016 -جىلدىڭ ناۋرىزى ارالىعىندا ساتىلاتىن ۇيلەردىڭ سانى 40 پايىزعا ازايعان.
ساراپتاما قىزمەتىنىڭ بولجامىنشا الداعى بىرنەشە ايدا جىلجىمايتىن مۇلىك باعاسى تومەندەۋى ءتيىس.
دەرەككوزى: businessnews.kz
