قازاقستاننىڭ ورگانيكالىق ءونىمدەرىنىڭ ساپاسى فرانسۋزدىق تاۋاردان جوعارى

استانا. قازاقپارات - ءىرى ريتەيلدەردىڭ ءبىرى قازاقستاندىق ورگانيكالىق ونىمدەردىڭ ساپاسىن فرانسۋزدىق ونىمگە قاراعاندا جوعارى باعالاپ وتىر.

بۇل جايىندا تابيعي تازا ونىمدەردى ءوندىرۋ ماسەلەسىنە ارنالعان جيىندا «جاسىل ەكونوميكا ءۇشىن جانە G- GLOBAL- دى دامىتۋ» كواليتسياسى باسقارماسىنىڭ ءتورايىمى سالتانات راحىمبەكوۆا كەڭىنەن بايانداپ بەردى.

اتاپ ايتقاندا، بۇل تۇرعىدا كوكونىس وسىرەتىن استانادان 40 شاقىرىم جەردە ورنالاسقان فيتوديودتى جىلىجاي مەن كۇن بيو ۆەگيتاريدىڭ مۇمكىندىكتەرى زەرتتەلگەن.

ەستەرىڭىزگە سالا كەتەيىك، بۇل ەكسپەريمەنتتىك الاڭ حالىقتىق «جاسىل» تەحنولوگيالار اكادەمياسى جانىنان قۇرىلدى. بۇل جەردە ورگانيكالىق ونىمدىك ءوسىرۋ ءۇشىن قۇرامىندا حيميالىق زاتتار مەن نيتراتتارى جوق جانە تابيعي جولمەن وڭدەلگەن كوڭ پايدالانىلادى.

«بۇل شاعىن جىلىجاي. ءبىز بۇدان بيزنەس جاساۋ تۋرالى ويلاماعان ەدىك. الايدا، بۇنداي قادام جاساۋعا ءبىزدىڭ سەرىكتەس بولىپ تابىلاتىن ءىرى ساۋدا جەلىسى ءتيىستى ۇسىنىس جاسادى. ولاردىڭ مالىمەتىنە قاراعاندا، ساتىپ الىناتىن كەيبىر ونىمدەر قىمبات، بۇل ءوز كەزەگىندە تۇتىنۋشىلارعا دا اۋىرتپالىق تۇسىرەدى. وسى رەتتە بۇل ساۋدا جەلىسى كوكونىستەر مەن وزگە دە ونىمدەردى تۇتىنۋشىعا قولايلى باعامەن ساتۋعا ءمان بەرمەك»، - دەدى س. راحىمبەكوۆا.

ونىڭ سوزىنە قاراعاندا، اتالعان ساۋدا جەلىسى ءۇشىن ەكولوگيالىق تازا ورگانيكالىق ءونىم دايىنداۋ تۋرالى كەلىسىم جاسالدى، سونىمەن قاتار سەرىكتەستەر ءونىمنىڭ ساپاسى بويىنشا زەرتحانالىق ناقتىلاۋ شارالارىن ءوز موينىنا الىپ وتىر.

«ياعني، ءبىزدىڭ ءونىم ءىرى ساۋدا جەلىسىندە «KZ Organic»  تاڭباسىمەن پايدا بولادى. بۇل رەتتە ءبىز بارلىق تالاپتارعا ساي بولۋعا تىرىسامىز. بۇل ساۋدا جەسىندە زەرتحانالىق زەرتتەۋ مۇمكىندىكتەرى بار. مىسالى، ولار ءبىزدىڭ ءونىم مەن فرانسيادان جەتكىزىلەتىن ونىمدەردىڭ ساپاسىن تەكسەرىپ، قازاقستاندىق ءونىمنىڭ قۇرامى كەيبىر دارۋمەندەرگە باي ەكەندىگى انىقتالدى. وسى ورايدا ولار ءبىزدىڭ ءونىم جاقسىراق ەكەنىن اتاپ، باسىمدىق بەرىپ وتىر»، - دەدى سالتانات راحىمبەكوۆا.

بەلگىلى بولعانداي، اتالعان ريتەيلمەن مەموراندۋم بەكىتىلگەن ەكەن. كواليتسيا ورگانيكالىق ءونىمدى اشىق ەگىستىكتەرگە ءوسىرۋ ۇسىنىسىن جاساپ وتىر.

«ارناساي اۋىلىندا جانە باسقا دا بىرنەشە ەلدى مەكەندە باقشا وسىرۋگە جۇمىسسىز جۇرگەن 100 ايەلدى تارتۋدى جوسپارلاپ وتىرمىز. ءبىز تاڭداۋلى ورگانيك- تۇقىمداردى، ورگانيكالىق تىڭايتقىشتاردى جەتكىزىپ، تامشىلاپ سۋارۋ تەحنولوگياسىن ورناتامىز. وسى جوبا اياسىندا سۋدى ۇنەمدەۋگە جول اشاتىن گيدروگەلدى، اگروتالشىقتاردى سىناقتان وتكىزەمىز»، - دەپ ءتۇسىندىردى ول.

توپىراقپەن ارالاسقان گيدروگەل كۇز جانە قىس كەزىندە جاڭبىر مەن قاردىڭ سۋىن بويىنا ءسىڭىرىپ، وسىمدىككە قاجەتتى ىلعالدى قامتاماسىز ەتەدى. ال اگروتالشىقتار وسىمدىكتىڭ مول ءونىم بەرۋىنە قولايلى جاعدايلار جاساۋعا مۇمكىندىك بەرەدى.

س. راحىمبەكوۆانىڭ پايىمىنشا، قازىرگى كەزدە ورگانيكالىق ءونىمدى راستايتىن قازاقستاندا ارنايى زەرتحانانى قۇرۋ ماسەلەسى كۇن تارتىبىندە تۇر. ونىڭ مالىمەتىنە قاراعاندا، ەلىمىزدەگى ورگانيكالىق ءونىمدى وندىرەتىن شارۋاشىلىقتار زەرتحانالىق ناقتىلاۋدى گەرمانياعا، تۇركياعا ءونىم سىنامالارىن جىبەرۋ ارقىلى الادى. بۇل زەرتحانالار استىق ساپاسىمەن قاتار، توپىراق تازالىعىن جانە باسقا دا كورسەتكىشتەردى تەكسەرەدى.

«ءبىز بۇل باعىتتا «نەلىكتەن ءونىمدى الىستا تەكسەرتىپ ءجۇرمىز؟ » دەگەن ماسەلەنى كوتەرىپ وتىرمىز. استىق ەكسپورتتاۋشى ءىرى مەملەكەتتىڭ ءبىرى بولعاندىقتان، بىزدە وسىنداي زەرتحانا بولۋى ءتيىس. زەرتحانانىڭ قۇنى ايتارلىقتاي قىمبات. دەگەنمەن دە ءبىز وسى ماسەلەنى كوتەرىپ كەلەمىز»، - دەدى ول.

اۆتور:   رۋسلان عابباسوۆ