نازاربايەۆ ۋنيۆەرسيتەتىنىڭ قىزمەتكەرى وبىر اۋرۋىن زەرتتەۋدىڭ جاڭا ءتاسىلىن ۇسىندى

استانا. قازاقپارات -  نازاربايەۆ ۋنيۆەرسيتەتىندە وتاندىق جاس عالىمدار سەمينار وتكىزدى. ارنايى ۇيىمداستىرىلعان ءدارىس ساباعىندا كەيبىر ماماندار وزدەرىنىڭ ستارتاپ جوبالارىمەن تانىستىرسا، ەندى ءبىرى عىلىم مەن بيزنەستى ۇشتاستىرا بىلگەن شەبەرلىگىمەن ءبولىستى.

 «بيوتەحنولوگيا: عىلىم جانە بيزنەس» تاقىرىبىندا وتكەن سەمينار Astana Business Campus عىلىمي پاركىنىڭ ءبىر توپ قىزمەتكەرىمەن ۇيىمداستىرىلعان.

 انۋاربەك وتەعۇلوۆ، Astana Business Campus عىلىمي پاركىنىڭ اعا مەنەدجەرى:

 - قازىر ءبىز ءتۇرلى شارالاردى وتكىزىپ جاتىرمىز. وسىلايشا، يننوۆاتسيادان حابارى بار نەمەسە وعان قىزىعاتىندار قاۋىمىن قالىپتاستىرۋعا سەپتىگىمىزدى تيگىزبەكشىمىز. وسى جەردە ولار وزدەرىنە سەرىكتەس، پىكىرلەس جاندى تابا الادى. تىڭ يدەيالاردىڭ تۋۋىنا ۇلەس قوسىلادى. جاڭا جوبالار جۇزەگە اسادى.

 سەميناردىڭ باسىم باعىتتارىنىڭ ءبىرى بيوتەحنولوگياعا ارنالدى.

 دانا اقىلبەكوۆا، نازاربايەۆ ۋنيۆەرسيتەتىنىڭ عىلىمي قىزمەتكەرى:

- مەنىڭ ۇسىنىپ وتىرعانىم -  وبىر اۋرۋىن زەرتتەيتىن جاڭا ءتاسىل. بۇل سالا فيزيكامەن كوبىرەك بايلانىستى دەر ەدىم. سوندىقتان بولار، بيولوگتار مەن مەديتسينا سالاسىنىڭ ماماندارى بۇل ءتاسىلدى اسا ۇناتا بەرمەيدى. ءبىزدىڭ ماقساتىمىز -  وبىر اۋرۋىنا جاڭا تاسىلمەن دياگنوستيكا جاساۋدىڭ ءتيىمدى ءارى وڭاي ەكەنىن كورسەتۋ. ول ءۇشىن بارلىعىمىز بىرىگىپ حاتتاما جاساۋىمىز كەرەك.

www.24.kz