پۋتين: تۇركيا ازاماتتىق سوعىسى جاعدايىندا تۇر
ماسكەۋدە جىل سايىنعى تىكەلەي ەفيردەن تۇرعىندار ساۋالىنا جاۋاپ بەرۋ كونفەرەنسياسىندا سويلەگەن پۋتين تۇركيا باسشىلارىن «تەرروريستەرمەن كۇرەسۋدەن گورى ولارمەن ىنتىماقتاسىپ وتىر» دەدى.
ول «تۇركيانى دوسىمىز دەپ سانايمىز، ءبىراق اقىلعا قونىمسىز ءىس ىستەيتىن كەيبىر ساياساتكەرلەرىمەن قاتىناسىمىز ناشار» دەدى پۋتين.
تۇركياعا قاتىستى تاعى ءبىر ساۋالعا جاۋاپ بەرگەن ول ەلدىڭ قازىرگى بيلىگى لاڭكەستىكپەن كۇرەسكە باسا ءمان بەرمەي وتىرعانىن ايتتى.
پۋتين ەلگە قارسى كەز- كەلگەن ارەكەتتەرگە جاۋاپ قايتارۋ كەرەكتىگىن تىلگە تيەك ەتتى.
ول رەسەي جاۋ قورشاۋىندا قالمايتىنىنا سەنىمدى. پۋتيننىڭ سوزىنە قاراعاندا، رەسەي الەمنىڭ كوپتەگەن ەلدەرىمەن جاقسى قارىم- قاتىناسىن ساقتاپ وتىر.
«ب ر ي ك س، ش ى ۇ بار، كورشىلەرىمىزبەن تاتۋمىز»، - دەدى ول.
رەسەي مەن تۇركيا اراسىنداعى قاتىناس وتكەن جىلى كۇزدە تۇركيالىق جويعىش ۇشاق سيريادا رەسەيلىك بومبالاۋشى ۇشاقتى اتىپ ءتۇسىرۋى سالدارىنان ۋشىعىپ كەتتى. بومبالاۋشىنىڭ ۇشقىشتارى سەكىرىپ ۇلگەرگەن. الايدا ونىڭ ءبىرىن جەردەن اتىپ ولتىرگەن. ۇشاق رەسەيدىڭ سيرياداعى اسكەري وپەراتسياسىندا تاپسىرمامەن ۇشىپ جۇرگەن، ءبىراق تۇركيا ۇشاق ءوز اۋە كەڭىستىگىن الدەنەشە رەت بۇزدى دەيدى. رەسەي جاعى مۇنى جوققا شىعارادى.
