قازاقستان، ازەربايجان جانە گرۋزيا حالىقارالىق ترانس كاسپيلىك كولىكتىك كونسورتسيۋم قۇرۋعا ۋاعدالاستى

باكۋ. قازاقپارات - قازاقستان، ازەربايجان جانە گرۋزيانىڭ تەمىرجول ۆەدومستۆولارى حالىقارالىق ترانس كاسپيلىك كولىكتىك كونسورتسيۋم قۇرۋعا كەلىستى.

بۇل تۋرالى كەشە «ازەربايجان تەمىر جولى» ج ا ق باسپا ءسوز قىزمەتىنىڭ باسشىسى نادير ازمامەدوۆ حابارلادى.

ءتيىستى كەلىسىمگە باكۋدە وتكەن ترانس كاسپيلىك كولىكتىك باعىت بويىنشا جۇك تاسىمالدايتىن وپەراتور-كومپانيالاردىڭ كەزدەسۋىندە قول قويىلدى.

كونسورتسيۋم مۇشەلەرى ازەربايجاندىق ADY Express پەن ACSC Logistics ا ا ق، قازاقستاندىق KTZ Express ا ق جانە گرۋزيالىق Trans Caucasus Terminals ا ا ق بولدى.

«جيىندا كونسورتسيۋمنىڭ بايقاۋشى كەڭەسىن قۇرۋ شەشىمى قابىلداندى. كەڭەس قۇرامىنا كونسورتسيۋمعا مۇشە كومپانيالاردان ءبىر وكىلدەن ەندى، ال ءتوراعاسى بولىپ «ازەربايجان تەمىر جولى» باسشىسىنىڭ ورىنباسارى يگبال گۋسەينوۆ تاعايىندالدى» - دەدى ن. ازمامەدوۆ.

ونىڭ سوزىنە قاراعاندا، وتىرىس قورىتىندىسى بويىنشا تاراپتار حاتتاماعا قول قويىپ، ترانس كاسپيلىك باعىت بويىنشا جۇك پويىزدارىنىڭ كەستەسى مامىر ايىندا انىقتالادى دەگەن شەشىمگە كەلدى.

ەسكە سالا كەتەيىك: 14- قاڭتاردا ازەربايجان، قازاقستان، گرۋزيا جانە ۋكراينا ترانس كاسپيلىك حالىقارالىق كولىكتىك باعىت بويىنشا جۇك تاسىمالىنا ارنالعان باسەكەگە قابىلەتتى جەڭىلدەتىلگەن تاريفتەردى بەكىتۋ تۋرالى حاتتاماعا قول قويدى.

ترانس كاسپيلىك حالىقارالىق كولىكتىك باعىت قىتاي، قازاقستان، ازەربايجان، گرۋزيۋ ارقىلى ارى قاراي تۇركيا جانە ۋكرايناعا، كەيىن ەۋروپاعا وتەدى. شىحىزى (قىتاي) - دوستىق-اقتاۋ-اليات باعىتى بويىنشا جۇرەتىن ءبىرىنشى سىنامالىق كونتەينەرلىك پويىز باكۋ حالىقارالىق تەڭىز ساۋدا پورتىنا وتكەن جىلى ءۇشىنشى تامىزدا جەتتى.