قوستانايدا ورتا ازياداعى ەڭ ءىرى ەسىرتكى بارونى ۇستالدى
بۇل تۋرالى بۇگىن جۋرناليستەرمەن كەزدەسكەن ق ر ءى ءى م ەسىرتكى بيزنەسىنە قارسى كۇرەس دەپارتامەنتىنىڭ باسشىسى سۇلتان قۇسەتوۆ مالىمدەدى.
كۇدىكتىلەردى ۇستاۋ وپەراتسياسى 7- ءساۋىر كۇنى قوستانايدا جۇرگىزىلگەن. ونىڭ بارىسىندا 15 ادام قولعا ءتۇستى. ارالارىندا قىرعىزستاندىق تانىمال ەسىرتكى بارونى، قىلمىس الەمىندە «ءبىرىنشى قارلىعاش» (پەرۆايا لاستوچكا) دەگەن لاقاپ اتپەن تانىمال 36 جاستاعى وش قالاسىنىڭ تۇرعىنى دا بار. ولار ورتا ازيا ەلدەرىن اۋعان ەسىرتكىسىمەن جارىلقاپ كەلگەن.
قىلمىستىق توپتىڭ قۇرامىنا قىرعىزستانمەن بىرگە قازاقستاننىڭ جانە رەسەيدىڭ ازاماتتارى دا كىرگەن. ولار وتە قىراعى قيمىلداپ، بىرنەشە اي بويى قۇقىق قورعاۋشىلارعا ۇستاتپاي كەلىپتى.
«قىلمىستىق توپ جارتى جىل بۇرىن ىشكى ىستەر ورگاندارىنىڭ كوزىنە ءتۇستى. جەدەل تالداۋ كورسەتكەندەي، توپ جاسىرىنۋدىڭ جوعارى دەڭگەيىمەن، ءاربىر مۇشەسىنىڭ ناقتى رولدەرى بولۋىمەن، ولاردى جەكە توپتارعا بولۋمەن، ءبىر-ءبىرىنىڭ جانە اۆتونوميالىق ارەكەتتەرى تۋرالى حاباردار بولماۋىمەن ەرەكشەلەنگەن، بۇل اقپاراتتىڭ ءوتىپ كەتۋ قاۋپىن تومەندەتكەن. سويلەسۋ جانە حابارلاسۋ كەزىندە تەك شارتتى لەبىزدەر مەن تەرميندەر قولدانىلعان.
گەرويندى جەتكىزۋ جانە توپ مۇشەلەرىنىڭ قوزعالىسى ءۇشىن تۇراقتى تەكسەرىلگەن تاكسيستەر مەن پويىزداردىڭ جولسەرىكتەرى پايدالانىلدى. ەسىرتكىلەردىڭ جەتكىزىلىمدەرىنەن اقشالاي اۋدارىمدار العان كەزدە جاسىرىنۋ ماقساتىندا قىلمىسكەرلەرمەن تۇراقتى مەكەن-جايى جوق الدىن الا دايىندالعان ادامدار تارتىلعان. نيەتتەرىن جاسىرۋ جانە ەسىرتكىلەردى ساقتاۋ ورىندارىن انىقتاۋدى بولدىرماۋ ماقساتىندا قىرعىزستاننىڭ جانە قازاقستاننىڭ ءار ءتۇرلى قالالارىندا جالدامالى پاتەرلەر ۋاقىتشا جالعا الىنعان»، - دەدى سۇلتان قۇسەتوۆ.
قىلمىستىق توپتىڭ ەسىرتكىدەن تاپقان پايداسىن ماماندار ءالى ەسەپتەپ جاتىر. بەلگىلىسى، ۇستالعان ساتتە ولاردان قۇنى 100 ميلليون تەڭگەدەن اساتىن 3 كەلى گەروين تاركىلەنگەن. قازىرگى تاڭدا پوليتسەيلەر اتالعان توپتىڭ وزگە 11 مۇشەسىن ىزدەستىرىپ جاتىر.
